仙人柱

這欉仙人柱，佇塗面懸273公分，

若閣加上盆塗下的就300外公分矣。

進前，對故鄉帶一節(大約半尺-15公分)轉來台中種，

看伊生直直，一直懸起去，

已經種有七八冬矣，猶毋捌開過花。

今年社區住戶時行種木瓜，頂個月，

隔壁也種木瓜矣(社區內第8欉)，

種的人攏講是矮種的木瓜，毋過逐欉攏大上(tsiūnn)二樓，

對面的住戶，是舊年種的，已經懸上二樓，遮閘日頭，

這馬隔壁閣種一欉，門口的光線會加足暗的。

仙人柱愛通風佮充足的日頭光，這馬煞無適當的環境生存，

想欲共徙位找無適合的所在，思考真久，只好做變通，

卻是看幾落工無法度下手，哎！閣較毋甘也就(tō)甘，

硬手將伊鋸斷，留頂節通好重種，留半尺的欉頭閣予伊發穎。

                                                        minda 2017.10.12