今仔下晡，佇社區中庭散步，
看著高太太提手機咧共in厝跤的木瓜欉翕相。
「哈！高太太，妳共木瓜翕相？」
「hēnn矣！我咧翕木瓜，妳看這粒在欉紅的，
我拄才line予阮大漢查某囝，共講這粒是欲予伊的，
叫伊緊轉來挽。」
行倚共看，有影到分矣。
「妳koh看這粒嘛咧紅矣，

我翕落來line予阮第二查某囝，

共講這粒是欲予伊的，叫伊一禮拜後就愛轉來挽。」

「啊恁查某囝是嫁佇佗位？」
「大漢的佇台中，第二的佇南投。」
講煞，高太太歡喜kah笑咍咍。 
對伊的笑聲中，

阮有感受著伊做阿母疼惜查某囝的心情。

minda 2017.8.12

註 :

翕相 : 拍照。

拄才 : 剛才。

行倚 : 走靠近。

到分 : 成熟。指植物到可採收的時候。

轉來 : 回來。

恁 : 你們、你的。