早起參加台語文讀冊會，出席的人無濟，有機會上課，我欲把握。

下晡去參加合唱班的聯誼。

今仔日的行程，我本來是全部取消的；因為支持的人選輸，鬱悴的心情透未離，加上想起往過若大選，小弟仔會載阮伊呀轉來田尾仔投票，嘛一定會將父母載來阮兜參阮同齊看開票。
選舉的結果無論是歡喜、是傷心，總有後頭厝的人分享抑是分擔。今年，艱苦的心情，干單會當佇網路揣安慰。
老大昨暝安慰我一睏，伊功力無夠，入眠進前心情猶是艱苦，想著阿爸我含著目屎入眠。

早起早早就睏袂去，落樓跤開電腦，看著昨暝參伊討論落選心情的網友留一條訊息，看著伊頭一句寫：

～寄望一定存在失望的危險～
我有雄雄精神的感覺。予我一个真大的力量，我又閣有力頭行出去矣。
下晡轉來了後，佇樓頂拍球。

正手拍一千球、左手嘛拍一千球。這是心情已經平靜才有法度做到的球數。昨拍無一千球心就浮佇半空中，拍袂落去。

我知影，新的煩惱袂斷，因為我是凡夫。

願意真心向佛，望佛帶領，予染塵的心有一个安靜的角落。

感謝佛的慈悲，予我真緊就揣著心情的出口。