年節的氣氛，更加使我思親。

整理樓跤的房間，眠床頭彼个相框內底，阿爸佮阿母陪伴阮蹛民宿的相片，若像才拄發生爾，毋拘事實已經是隔踮兩个世界矣。

對著相片輕輕叫伊呀、爸～。心酸目箍澹。

盈暗暗頭仔去倒糞埽，路邊無人的所在等糞埽車的時，舉頭看天。

天星一粒一粒閃爍爍；無聊算天星，攏總有一、二十粒。

以早囡仔時的天星掖滿天。即馬敢是天神共天星收倒轉去矣？

毋是、是光害佮老花仔目予天星訪見去。

看天星、又閣想起父母。

叫爸阿、目屎予伊輾落來。

橫正無人看，流一下仔思親的目屎，是思念的基本儀式。