分予人疼

自年前，社區內A、B棟的住戶定定走過來阮這棟賞花，

逐家熟似以後就交流照顧花草的經驗，

最近開始開喙(嘴)討in佮意的花草。

四月鼓吹花(孤挺花)當開，

單瓣、複瓣的攏媠噹噹，大蕊閣清芳，濟人愛，

已經開喙討矣，規氣連盆攏捀(phâng)轉去。

鹿角蕨，是阮用蘭花佮朋友交換幼栽來種起的，

顧幾落冬大成叢，開始有人欣羨，徙誠濟幼栽送人，

後來阮留幼栽重種，母叢放手分人疼，

送予欲搬走的好厝邊仔，伊足歡喜的。

重種的鹿角蕨，佇顧二冬後嘛大叢有生湠幼栽矣，

彼工A、B棟的住戶相招閣過來講欲愛，

阮仝款留幼栽做種，二板攏予in提轉去，

有交代in：「有佮意就分予恁疼，愛好好仔照顧。」

in笑咍咍應講會好好仔疼惜。

minda 2021.4.11