你若平安、就是好天---(台文)

2022.02.20

你若平安、就是好天---

倚成百年前的林徽因按呢講。

從我蹛來斗六，天氣若像毋捌像今仔日遮寒，嘛有可能寒甲袂記得矣。

毋拘今仔日我內心是好天。

因為經過病痛的貓咪平安矣。

正月初六彼日，阮去大里揣小妹仔。

出門進前驚仔siunn uànn轉來，貓仔碗內底有加囥飼料。

彼下晡轉來，飼料猶是出門時的量、伊無食！

是咧張予伊顧厝？抑是身體有啥無拄好？

彼暝，嘛無啥食。

開工矣，哪上班哪袂放心，拍算下晡請假tshuā伊去hông看。

先khà電話問病院開未？醫生建議慢且tshuā去予看，先提藥仔轉來食看咧。

食三工的藥仔了後，飼料欲食矣。

掠準好去矣。

誰知回南的風颱閣較強。

恬恬仔像雞母ku咧，毋食、毋啉、袂叫、袂吵。

看毋是勢，閣去提藥仔。

頂三工份的藥粉，攪佇罐頭就騙伊共藥仔食落去矣。

這遍藥仔提轉來，無論伊偌愛食的罐頭，毋開喙就是毋開喙。

只好用灌的。

參阿勳兩人三舞四舞才共一份藥仔灌落喉。

毋知是著驚？抑是藥仔siunn歹食。

食落去無甲一分鐘，規个吐吐出來。

醫生指示，過半點鐘才閣灌一擺。

若閣食袂落去，掠來注射。

醫生知影我行動無方便，特別交待。

若欲掠來注射，著愛有一个會當佇病院內底協助抱貓的人，總袂當干單檢查就注麻射。

佇病院內底會當抱貓的人。

這聲考倒我矣。

第二日拜六，病院看甲17:00，禮拜病院無開。

拜六著去參加大官仔做頭七，拜一大官仔出山....

無爽快的貓，敢等會到拜二阮有閒才處理？當然袂使得。

拜五暗頭仔七點外，共人佇兩百外公里遠南台灣的阿維講我的難題。

伊共工課下咧，講：我隨出發。

11點外阿維到位。

當初欲飼貓，阿勳有提醒我，貓平安的時是真古錐，若是身體無四序著走病院的時，咱無才調。

愛貓的伊，勸我莫閣飼貓。

彼時我想講，都毋是毋捌飼過，大不了載出去看醫生爾爾，哪知影這馬去病院，著家己抱予醫生看？哪知影佇無閒大官仔後事的這時陣，貓咪身體出問題。

無奈兩字，像針ui-ui-tsǹg，tsǹg佇我的心肝，足疼！

第二日貓拜託阿維，阮出門。

醫生講貓著蹛院，除非佇厝裡家己會曉注大筒射。

貓是敏感的動物，若蹛佇生份的病院，毋食、毋啉、毋放屎尿是真平常的現象，有時陣oh看出來伊真正的問題。

阿維問醫生，注射敢有困難？

醫生講若欲學就會曉。

阿維共貓tshuā轉來、共射紮轉來。

經過一禮拜，複診。免閣注射矣，藥仔閣食一禮拜就OＫ。

我嘛學會曉飼藥仔矣。就放阿維轉去趁錢仔。

足感謝阿維，佇我上困難的時陣，透暝開車來，出手幫忙。安著我的心、解除貓咪的病疼。

阮囡仔捌講，毋是逐个家庭攏像恁厝遐溫暖，愛感恩。

我知！！

佇離開父母了後無偌久，我就知影矣。

阿維講另工貓仔伊才掠去飼。

若以早，我死都毋肯放

今、我了解矣。

疼愛的心情雖然迷人、能力無夠的時，毋通強求。

若閣毋放手，這隻貓會予我［疼- -死]。

＊ ＊ ＊

siunn uànn=太晚

tshuā=帶

hông=予人

khà電話=打電話

siunn歹食=太難吃

ui-ui-tsǹg=刺痛

oh=難