2022.06.15寫

早起八點thóng-á，佇巷仔溪仔邊遮等復康巴士，欲參阿勳去回診。

阮兩人資深［共殘黨］，個性攏袂愛麻煩人。

其實會使家己駛車去；毋拘，上、落車著搬兩台輪椅，thiám先莫講。到病院的時，身障停車位往往停滿車。停車場到醫療大樓有一段路，好天曝日捒輪椅無算啥，上驚的是落大雨，無手通舉雨傘，身軀會ak甲澹糊糊。

坐客程車?一般若聽著愛載兩台輪椅，少人肯載。我若是計程車運將，我嘛袂愛載，一台客程仔無偌大台，兩台輪椅占位著誠闊。

佳哉身障福利已經做到遮，一禮拜一个身障者有使用一遍的額度，超額的時付費嘛會使閣坐。感覺真滿足。

是講雄雄有狀況欲坐復康巴士，袂赴預訂就是另外麻煩矣，到時才煩惱。

早起開復巴的張先生，態度真親切，伊講伊提早出門，想袂到阮嘛提早出來等伊。

到病院的時，伊講咱雖然約11:30，若是袂赴，妳khà電話共我講，我會等，妳免趕哦。

做一个身障者，阮有得著比別人閣較濟的幫助、真感謝！

＊ ＊ ＊

下晡繼續休假。

去郵局滙款想欲sūn-suà修改個人佇郵局的基本資料，台灣pay才辦會成。

抽牌仔的時，顯示著等9个人才著我。

想欲坐落去等，穿鐵鞋的跤，欲坐、欲起來攏誠費氣。歸氣徛咧等，9个若緊應該免徛偌久。

想袂到等諴久，干單一个窗仔口咧辦，唯一的窗仔口閣若像拄著難題，號碼久久攏無進展。我是徛甲強欲un落去。

邊仔辦郵務的小姐掠我看一下，共我ia̍t，欲先替我處理。

我那滙款、那問伊修改基本資料的問題。

伊笑笑講：歹勢！按呢妳著閣等怹哦。

我講：多謝，我知影妳是特別為我處理的。真濟人咧等，我另工才閣來就好。

伊一直共我講歹勢。

其實是我家己體力無才調閣等落去，多謝辦郵務的小姐…

做一个無方便的人，阮得著比別人較方便的服務、感恩！

＊ ＊ ＊

早起有預約下晡中醫診所的賴醫師。

診所拄好佇郵局邊仔爾。

到位的時猶袂開始看。

掛號了著等六个。徛佇診間門口等，嘛是毋敢坐落去，萬一叫著我的時，欲徛起來我會足緊張。賴醫師入來看著我，佇所有的燈攏猶袂to̍h進前，先叫我入去問診。予我免閣徛咧等6个人。

做一个[老殘]，阮得著特別的優待、感動！

上歡喜的是，阿勳回診無問題、感謝天！

八點thóng-á=八點多。

thiám=累

ak=淋

khà電話=打電話

sūn-suà=順便

un落去=蹲下去

共我ia̍t=跟我揮手

猶袂to̍h=還沒亮