2021.11.18

可能我細漢的時，是佇稻草堆大漢的囡仔，所以看著草總的相片，就有一種溫暖的感覺。

阮阿爸是做田的，稻仔收成的時，伊有帶一班割稻仔班四界去割稻仔。

半晡半暗竹跤的雞母若生卵，阮伊呀會叫哥哥共生雞卵提去田裡予阿爸食，聽講食生雞卵會退火。

哥哥提雞卵去田裡的路裡，會ná行ná耍彼粒雞卵，tàn懸懸、才閣共承起來。

大漢了後捌問哥哥，你按呢耍雞卵，攏毋捌失手？

伊講毋捌，若無阿爸欲食啥？

我講huān-sè你耍破去無提去，阿爸叫是彼工雞仔無生卵。

毋拘，我猶是相信哥哥講的啦。

哥哥嘛會去抾tiū-seh。

一捾一捾飽tīnn的稻穗，若像哥哥飽飽飽的跤肚仁。

哥哥畢業了後隨去台北食頭路，彼年過年伊頭一遍轉來，我門口埕等伊，目睭對許厝崎仔遐金金相，閘門跤行入來一个瘦瘦的少年人，有人咧叫：阿新轉來矣！

阮哥哥？！

我猶咧等我心目中彼个勇壯、跤肚肉結實仔結實的哥哥。看著彼个皮膚、瘦瘦閣懸懸的生份人，有淡薄仔失望。阮哥哥咧？

-------- ------ ------

聽講阮阿母欲生阮小妹仔已經順月的時，猶咧擔稻草跳過溝。

稻草佇彼時的農家是誠重要物資。

一總一總的稻草擔轉來疊做草垺，欲用就有。以早的農家，厝跤一座一座的草垺，攏疊佇離灶跤較遠的所在，阮兜的草垺疊佇離灶跤閣隔一間豬牢、一个pùn-tun的所在，細漢的時寒人覕佇草垺跤誠燒。毋拘著行過豬牢跤佮pùn-tun邊，有較遠寡仔。這馬回想起來，按呢其實較安全，因為稻草容易引火，若離灶跤siunn近，萬一煙筒若有火星飛出去，是危險的代誌。這是我家己想的，今、已經無地問矣。

稻草除了in tsháu-in囥起來好起火，閣會足濟用途。

聽二姐講，佇寒人伊呀會共稻草曝曝咧，tshu佇草蓆仔下面，暗時仔睏起來軟軟閣燒燒。

阿姐講，當伊呀無閒咧tshu稻草的時，怹會起哩眠床頂懸跳來跳去，伊呀誠有耐心，等怹耍甲到氣，才閣共稻草tshu予好。

我個性較浮，對囡仔的耐心，我無學著。

----- ---- ----

以早的農家雖然家家戶戶攏有草垺，毋拘罕呢有火災發生。

記持內底，火災發生攏是佇足遠的所在。

彼个年代毋捌看過消防車。

若聽著遠遠有人咧喝：火燒厝哦！火燒厝哦！

厝裡的壯丁鉛桶仔捎咧就走出去，向火災的現場直衝。

彼時逐个壯丁攏是義消。

阿爸講伊上遠欲衝到溪湖，彼遍溪湖大火災。對柳樹湳衝到位，火已經被控制矣（應該是講燒甲差不多無啥好燒矣）。

彼个年代嘛逐个壯丁攏是義警。

暗時仔恬靜恬靜的庄跤所在，若聽著有人喝：掠賊哦！掠賊哦！

厝裡查甫人柴棍仔舉咧，佗位喝掠賊仔的聲就對遐衝去。

厝裡的查仔人嘛舉一支棍仔，顧佇門口，驚仔賊仔覕對遮來。

捌看對面的二咪、菁仔姆佮伊呀，怹咧顧門口的情形。

這馬想起來有淡薄仔好笑，彼時，會tshuah呢

看著網路朋友的相片，想著遮个。

註：

1.ná行ná耍=邊走邊玩。  2.tàn懸懸=拋高高  3.huān-sè＝也許

4.tiū-she=收割時掉落的稻穗  5.飽tīnn=飽滿  6.siunn近＝太近

7.in tsháu-in=束乾草燃料  8.pùn-tun=堆肥  9.tshu=舖  10.草垺=草堆

tshuah＝害怕、顫抖