對日頭跤收入來曝甲酥酥的衫的時，日頭猶真大。

機車騎咧出門去烏白踅。

離開厝附近的每一个景色，攏略仔生份、略仔熟悉，這是一个路痴特有的驚喜。

路邊一座園仔，內底的雞仔、鴨仔，有雄雄倒轉去細漢時陣，阮兜後壁宅仔彼簇芭樂園。

嘛是這種天氣ta-ta（乾燥）的寒，嘛是這種日頭光映映的冷。

芭樂欉跤的樹葉仔酥酥，踏落去會發出脆脆的聲音。

倚晝，一个人趖去芭樂園，透過樹葉仔看天頂的日頭。

食飯時間若到，透過前後兩落三合院的厝裡彼爿，伊呀咧hiàm（呼叫）：轉來食飯哦！

彼个聲，遠遠、細細聲，含著溫暖的呼喚。真好聽。細漢時想欲學彼種聲叫家己的名。學袂來，因為家己的聲，總是無距離的大聲。

 袂當倒轉去的細漢時，雖然只有是懷念，總是歡喜看著園裡，閒閒行踏的雞仔鴨仔，抾著一甲子以前的心情。