2021.11.09寫

阮厝對故鄉田尾仔搬去石牌仔的時，我佇和美仁愛學校蹛學舍。

搬去石牌仔了後，攏總搬7擺的厝，才搬去阿爸買佇石牌仔文林北路的所在。

誠拄好，搬７遍的厝，每一个所在我攏蹛過。

蹛上少日的是…我歇寒轉到厝，無幾工就搬suá位，蹛上久的是國中畢業蹛到高中一年歇熱，搬去文林北路。

印象當中，搬一改厝，就愛tàn掉一寡仔物件。我攏講若像著賊偷咧。

雖然我攏蹛學校，佇厝裡的時間無濟，毋拘我是連一張同學寄來的批khak攏毋肯tàn掉的，所以搬厝對我來講，毋是費氣、是毋甘。

這幾日攏足早就去睏，嘛真緊就入眠；毋拘睏眠攏無夠，因為總是有足忝的夢來觸纏。

-- -- ---- ------

鐵床頂頭，貯滿一箱閣一箱衫仔褲的紙箱仔，阮幾个囡仔佇邊仔耍，伊呀手無停過，佇欲睏進前著整理好勢，才有床位通睏。毋拘若像永遠整理攏袂好勢。

伊呀、妳莫一直做啦，阮想欲佮妳講話！

予家己講話的聲叫精神，原來是一場夢。

-- -- ---- ------

這只是這幾日其中的一个夢。

最近總是按呢

真忝、較早去睏、無偌久就入去踅各種無仝的夢境、然後精神….。

看眠床頭的時鼓仔，翻點矣！

自按呢，佇眠床píng來píng去，若是煎魚仔嘛píng甲爛去矣。

一直到聽著送報紙的聲，才略略仔閣lìm去，天嘛得欲光矣。

伊呀誠罕呢來入夢。

想欲共講：伊呀，咱佇夢裡開講，妳莫無閒…敢好？

＊

suá位=遷徙

tàn=丟掉

批khak=信封

píng來píng去=翻來覆去

lìm去＝微睡