2021.10.22寫

拜二趕佇下班進前共資料送出去，結束緊張的一日。

想起以早阿爸佇割稻仔季節結束了後，伊會去街路看一齣仔電影。

這時陣，我若像割稻仔了後的阿爸，hiah忝、hiah想欲歇睏。

阿爸是割稻仔班的班長。

除了仝款參人落田割稻仔、擔粟仔之外，阿爸逐暝著先發落第二日有偌濟人會當出班、欲割稻仔的稻田，路線的規劃，順路割落去才毋免一个重khuânn-khuânn的機器桶扛咧踅遠路。

彼个年代步步用人工，無車替咱載割稻仔的機器。

一日無閒煞。別人已經咧歇睏、儲備第二日的體力。

阿爸這時陣猶咧無閒，伊佇房間阿母的化妝台遐，點一pha五燭的電珠仔，記錄當日割過的稻仔、記錄出班班員出席的情形等等的數。

日暝操勞，莫怪阿爸需要佇工課做一段落的時，去看電影tháu開penn ân-ân的神經線。

我袂曉割稻仔，毋拘真忝的時，我會想著欲學阿爸。放鬆一下。

請休假、來去𨑨迌。

無偌久進前，阿勳講：毋捌去過日月潭，想欲去看看咧。

伊按呢講，我才知影佇仁愛學校舉辦的春季、秋季旅行，伊攏無參加。

毋是伊無愛耍。是序大人無支援，人去旅行的時，伊只有是顧教室的份。

頂年仔手搖車伊有報名欲去，拄著風颱。

今年手搖車得欲啟程的時，拄著疫情。

趁請休假，小弟仔阿維拄好佇斗六，來去日月潭。

阿維的車較大台。載2台免收起來的輪椅、一隻貓佮阮兩人。

記持當中的日月潭，細細條仔的山路，到位只有山、只有水。

去仁愛讀冊，頭一擺會當參同學去旅行，就是日月潭。

遊覽車行佇坎坎坷坷的山路，車內底充滿綠油精的味。會記得車坐足久的才到位。

國校仔四年進前讀田尾仔國校，同學去［遠足），我干單會當顧教室。因為我的跤無力［遠足］。

轉學到仁愛學校，我是一隻tháu開韁索的野馬，有耍的，我一定袂缺席。

國中二年升三年的歇熱，學校老師揀選一寡仔學生去日月潭參加三工的［全國殘障大露營］。參加的學生仔，有目睭無看的、耳仔聽無的佮阮這種跤袂行的。愛耍的我有予老師選著參加露營，予我有機會看著日月潭的黃昏佮透早，無仝款媠媠的景色。

佇日月潭畔搭テント，早起時目睭peh開，是滿山輕輕仔徙振動的雲霧，老師講，彼叫做［山嵐］。

今、記持中的景緻tsiâu無仝。公路大大條，車呼呼叫駛真緊。大樓一間接一間，山已經變面，變甲予我袂認得，掠準猶佇市區，其實已經到位。

阿維車駛入去向山遊客中心。非假日，阮閣早出發，挺好揀一个仔合意的停車位。倚晝欲離開的時，車位已經滿。是佗來的遊客？攏免上班？！

遊客中心外口，秋天潭水滿滿，離水遮呢近。遮、敢會是當年搭テント的所在？

看伊坐佇水邊。

內心咧想啥？歡喜踏入內心仰望的所在、抑是對過去生命中的不足咧感嘆？

耍過頭的我，竟然毋知影伊連日月潭都毋捌來過。

佳哉伊肯講出來，替伊歡喜，願望達成。

多謝阿維替阮圓夢！

***

hiah=那麼

重khuânn-khuânn=笨重

tháu開=打開

penn ân-ân=緊繃

テント=帳棚

tsiâu=全