幾工前看著學校內底的＂小葉欖仁＂樹葉發芽，我共翕二張相片。頭一張內底，相隔壁的二欉＂小葉欖仁＂，一欉已經是規欉青青青，樹葉發甲足密的，另外一欉卻是無半片葉仔發出來；第二張相片是隔工翕的，原來無看著葉仔的彼欉竟然開始看著青青的樹葉。轉到辦公室內底，隨手拍一首台語詩：

阮兜隔壁有春天

昨暝聽著伊的跤步聲

對誠遠的所在轉來

風

佇暗夜中輕輕仔吹

心

佇向望中慢慢仔飛

透早阮兜隔壁有春天

伊笑文文

向我

擛

手

共我講

你毋免傷著急

明仔載

就輪著你歡喜

佇上台語課的時陣，我印這首詩參學生囡仔討論，想袂到有誠好的回應。

頭一个＂伊＂是啥人？

跤步聲是啥物聲音？

你若是彼个第一人稱，你聽著啥物聲音？

風佇暗夜中輕輕仔吹的感覺是按怎?

為啥物心會佇向望中慢慢仔飛?

伊是咧向望啥物?

這首詩的第一人稱是啥人？

為啥物講透早阮兜隔壁有春天？

阮指的是啥人？

伊笑文文我擛手內底，這个＂伊＂指的是啥人？

按怎講明仔載就輪著你歡喜？

上蓋趣味的代誌是，學生的意見參創作者--我的無相同，而且討論了後，我竟然感覺學生的想法比我較好!!

伊笑文文我擛手內底，這个＂伊＂指的是啥人？

作者，也就我佇寫詩時的想法是"春天"，學生卻是認為是隔壁彼欉頭先發葉仔的＂小葉欖仁＂。

我感覺學生的想法較有道理，因為按呢，這首詩內底的角色閣較豐富。