下晡佮阮後生去竹北看日本"飛行船"兒童舞台劇的表演，敲電話欲交待照顧阮老母的印尼小姐，下昏免煮阮兩个人的飯。

結果厝--裡電話無人接。我知影一定是伊捒輪椅送阮媽媽去公園仔，參其他的老大人開講。想講拍手機仔予伊，想袂到伊煞無紮手機仔出去。這聲就頭大囉！節目欲開演啊，若無事先交待好，飯會加煮無打緊，阮老母六點等無後生佮孫囝做伙食暗頓才是害。

想來想去，去予我想著一步: 用台灣羅馬字拼音拍

bo tng khi tsiah png, ka a ma kong. 

 傳text 予伊.  心內想講伊會曉講一寡仔台語，印尼話嘛是用拼音的，無定著煮飯進前伊若有看著，會捌我的意思。

結果表演看一半，收著伊的text寫講:

OK！

我若是用漢字

無轉去食飯，共阿媽講。

text，伊看有才是怪奇咧。

用台羅嘛會通哦。