* (演講稿)

過年的時陣                           

各位評判老師、各位同學，逐家好！  (行禮)  

我是第○號，今仔日欲演講的題目是：過年的時陣。  

         時間過得誠(tsiann5)緊，阮猶未赴得(tit4)斟酌(tsim1-tsiok4)思考，講這ㄧ年已經是欲結束矣(ah4)！

         過年是一年中上重要的日子，伊毋但(m7-na7)是家家戶戶團圓的節日，也是予咱(lan2)迎接新的一年的開始。若講著我，我上佮意過年的時陣，因為過年會當相(sio1)連紲(sua3)歇睏、提紅包、猶有啖糝(tam7-sam2)家己愛食的四秀仔。

         過年若到的時，厝裡內內外外大摒掃的工課袂少，只要共這的工課攏做煞，保證敢若(kann2-na2)親像新厝同款，清氣溜溜，就連規个人嘛會感覺精神百倍oo5！過年的時，我上期待二九暝彼工，透早起床，阿母就(to7)會開始攢(tshuan5)足腥臊(tshenn1-tshau1)的好料，阮(guan2)囡仔就鬥跤手貼春聯，喙內閣沿路咧食甜粿，歡喜kah4喙笑目笑。

         佇食飯前，阮會去買飲料(im2-liau7)，這个時陣，我會順紲買兩包仔四秀仔，彼是我上歡喜的事志，閣來就是暗頓圍爐食團圓飯，阿母攏煮kah4足豐沛的，有真濟年菜，像「長年菜」，食了會長歲壽，若食「菜頭」就有好彩頭、閣有「魚」袂當吃完，才會當年年有餘，猶有足濟咱愛食的物件，攏是佇過年時足有意義的。

         圍爐煞，過年上重要的，就是愛共厝內的序大人拜年，祝福父母身體健康快樂、平安如意、年年趁(than3)大錢，佇這个時陣，父母攏會笑微微，用手摸我的頭殼，呵咾我誠乖閣真捌事志，順紲送我一个大紅包，講欲予我平安過年，嘛鼓勵我愛閣較拍拼讀冊的。

         隔轉工就是正月初一，逐家攏講：「初一早，初二早，初三睏到飽，......」，曷(ah4)若是我，佇過年時攏是睏到飽，毋過，阮攏會綴(tue3)阿母去廟寺拜拜，佇拜拜的時陣，下著新的願望(guan7-bong7)，我的願望是向望(ng3-bang7)佇新的一年，阮全家攏會當健康、平安順利，拜煞會相招去行春，共親友拜年，嘛會接著來拜年的電話，阿爸攏講：「過年是新的一年的開始，好話傳上天，歹的就要放(囥khng3)一邊。」所以，過年時講話，第一句一定要講好話，才會有好的開始，毋過我攏會歹勢，所以上捷(tsiap8)講的話就是「恭喜」啦！

         過年時的事志，實在是鬧熱閣趣味，予我三工三暝嘛講袂離，曷毋過上歡喜佮上重要的，就是阮一家伙仔，快快樂樂團圓，過一个好年。向望逐家嘛攏佮我同款，佇過年的時陣，會當歡歡喜喜，快快樂樂！最後，我欲祝福逐家闔家平安、萬事如意。

 我的演講就講到這結束，多謝逐家！

        minda 2013.11.1