《圖與文》綿羊姐姐

【怹的故事001主角：清風】

清風是一个蹛佇較倚彼爿山頭內底的中年查埔人。

伊無某無囝，干焦一个人共稅厝蹛，伊講厝稅較俗，厝閣是伊上蓋佮意的

『三合房』的建築，所以一蹛落來，伊就毋捌想過講欲閣徙去佗落矣。

清風對少年到這馬，看起來攏仝款烏焦瘦，這共伊長年所做的工課有真大的關聯。

對伊來講，歸粒山攏嘛是伊的工課場，只是蓋濟人對伊咧做啥物工課，

是按怎無欲娶某生囝，一直攏是哩哩囉囉。

猶毋過，若是較有咧交陪的人攏會感覺伊咧做的代誌實在是蓋趣味。

伊咧做啥物貨？

原來，伊著是去山內四界揣看敢有靈芝，尤其是名叫作『赤靈芝』的品種。

若揣著，就會共伊挽起來，漸漸收，聽候挽有一布袋了後，才會通知人來買。

伊嘛會順紲挽一寡仔菇類，抑是剉一寡野生的麻竹筍，若是價數無蓋懸，

有時陣著規氣送予厝邊頭尾食。

清風過慣勢自由自在的生活，著漸漸對作穡無任何的興趣矣。

頭前庄的阿桂姨仔想欲用錢請伊去王梨園鬥相共，伊共阿桂姨仔講，

叫我去王梨園做工課，著若親像是叫我去吃食頭路仝款。我的時間佮自由

毋著攏會予你縛死死矣？毋通按捏啦！

一工落來，清風定定嘛攏干焦食一頓中晝頓。

伊對工課佮生活方式攏有家己的堅持，甘願聊聊仔做、儉儉仔用，

嘛無愛活佇別人所認為按怎按怎才是正常的生活的彼種規則當中。

清風愈來愈愛家己所過的生活方式，伊上愛恥笑家己，嘛定定對厝邊頭尾講：

『我正港是一个標準的“貧惰賺錢，骨力清幽”的閒人啦！』