講柔輭語(註1)

    〤綺自小漢著真慈悲，定定佮我講：伊感覺獅仔、老虎真可憐！攏愛食別人的性命，袂當食素！毋過〤綺的個性活潑，淡薄仔坐袂椆(註2)，欲予伊乖乖仔上課抑毋是遐爾(註3)簡單，安慰的是伊定定畫真媠(註4)的圖送我、寫真古錐的字句、講予人心花開的言語，久來鋼琴嘛愈彈愈好。有一擺伊上台表演，班導師真佮伊鼓勵，擱寫聯絡簿感謝我的指導，自安爾〤綺擱較認真，上台演奏的歌曲嘛愈來愈精采，〈雨夜花〉、〈淚的卡農〉、〈小夜曲〉、〈夢中的婚禮〉、〈月光奏鳴曲〉…。

   這幾冬來，〤綺唯天真活潑的小朋友，變作一個挑弄(註5)的媠姑娘，因為佛教家庭的善因緣，家長按算欲送伊去南投讀〤台國中，甚至鼓勵伊出家，毋過伊會問講：

「老師！你為啥物無鑽耳空?」

「因為無想欲違反自然」

「若安爾，你為啥物欲點胭脂?」

「老師氣色無你遐好，驚佮人驚到」

「老師才袂咧！」

每一冬暑假，攏可能會參心愛的學生相辭，今年〤綺欲結束這爾濟冬的課程，連伊的媽媽攏目箍(註6)紅，未來有無限的可能，有一工伊若是真正出家，應該嘛會是一個講柔軟語、法緣殊聖、度化無數的好師父。