最後一節課

佮君ㄨ是佇才藝班熟姒的,彼陣伊才讀大班,已經看會出聰明佮穩重,半年了後家己開教室,紹介別个老師去接鋼琴課,過三個月怹爸爸敲電話講:君ㄨ想欲唯東勢厝來這上課,這个囝仔雖然真恬(註1),但是家己真有主見。

肢體無方便的爸爸每禮拜六接送上課,坐佇車頂等伊一點鐘,冬半(註2)中間,每一遍(註3)檢定攏真順利,後來伊的手因為某種皮膚病的困擾,停課四冬,六冬前又擱轉來上課,進步擱較明顯,今年伊以繁星計劃考椆台大,家己嘛欲去進修,一切若像攏安排甲真拄好(註4)。

真歡喜佮君ㄨ結這爾久的善因緣,相信無其他的老師會經歷伊人生的幼稚園、小學、國中佮高中階段,這濟冬來除非沿海淹水抑是怹爸爸出差才會請假,有一擺因為職業性的嚨喉梢聲(註5),辭掉彼工所有的學生,干但上君ㄨ的課,知影輕柔、簡短的解說伊著會理解,一方面嘛無想欲耽誤伊路途這遠的課程。

最後一節課送伊一套古典音樂CD,希望這幾冬的音樂培養對伊開啟美麗人生有幫助,嘛希望音樂會當做伊一世人的好朋友,陪伴伊度過每一个順序抑是無順序的日子,伊回送雞卵糕禮盒,無寫溫馨的卡片,嘛無送花、留目屎,真有家己的風格,顛倒是我忍袂椆共伊攬一下,伊是孤查某子,此去上思念伊的人,應該毋是我。

 註1：沉默、安靜。

註2：一年半

註3：每一次

註4：剛好

註5：聲音沙啞。