五線譜情結

最近天氣較冷,無注意煞感冒,去病院提藥仔,醫生對我的職業真有興趣,講伊自小漢著感覺會曉彈鋼琴的人真厲害,讀冊時代嘛有修過「音樂欣賞」課,毋過音樂史四大時期「巴‥巴‥巴‥」一時講袂出來,我接落去講:「巴洛克、古典…」,伊搶咧講:「上尾一個是『當代』對無?」,雖然看無五線譜,總是有增加一寡音樂素養。

上課的時陣,將醫生講的話提出來鼓勵學生,小朋友攏足認真咧背音樂史四大時期,嘛講欲好好練琴,因為安爾會比醫生阿叔擱較厲害,其中有一個講:另工嘛欲換去看彼個醫生。

一個朋友去參加潛能訓練課程,轉來了後講:其實真濟人內心攏有一個敨(解)袂開的心結,有的人是預官考試無通過,有的人對戶外運動無內行,有的人對家己的聲帶無滿意,有的人佮父母關係無理想…,情結有時陣會因為其他成就,淡化或者是隱藏,有時陣會因為生活經驗改變看法,總是愛轉念頭、接受事實,毋通折磨家己。