我看本土音樂劇〈四月望雨〉

〈四月望雨〉分別是鄧雨賢作曲的四首真有代表性的台灣歌謠：四季紅、月夜愁、望春風、雨夜花的第一字，嘛是一齣以台語、客語、華語、日語四種語言演出的優質本土音樂劇。故事背景是日治時期1930-1940年代的台北大稻埕，主要人物有作曲家鄧雨賢、作詞者陳君玉、歌手純純、愛愛、鍾有妹(鄧雨賢的牽手)等人。

 身穿時髦、整齊的衫褲、踏著流行舞步、手捧著西式咖啡的烏狗兄、烏貓姊(註1)，因為中日戰爭的因素，大量物資支援前線，唱片公司、咖啡廳只好關門歇睏，台灣歌謠的黃金時代被迫結束，淒美的「雨夜花」甚至予政府改作鼓勵從軍的日本軍歌，鄧雨賢為著閃避戰禍轉去桃園芎林國小教冊，三十九歲英年早逝，留落來五十外首經典的台灣歌謠傳唱人間。

 留學日本的鄧雨賢，一九○六年出世，桃園縣龍潭客人，一門三秀才。受著漢學舊傳統佮西方新思惟的衝擊，皇民身份抑是台灣血統的認同掙扎，台灣人到底是啥物人？到底為誰而戰？為何而戰？敢會當政治歸政治，藝術歸藝術？無國家，藝術為政治服務的悲劇，恐驚會一再重演。

 劇中描寫純純參鄧雨賢有一段情，毋過根據仝款是古倫美亞唱片公司專屬歌星的愛愛佇電影《跳舞時代〉的口述，純純談情的對象應該是陳君玉；劇中純純的日籍翁婿戰死沙場，但是根據〈台灣歌謠臉譜〉這本冊，純純的翁婿是得著肺癆，翁婿斷氣了後純純擱獻出最後的唚(註2)，嘛因為安爾受著傳染，二十九歲發病身亡，會使講是為愛無顧一切的奇女子。

註1：指時尚又俊美的年輕男女。

註2：親吻