重回校園

這兩三冬一直有擱進修的念頭,想欲轉去嘉大煞無音樂所,南華干但有國樂,雲林的大學攏是工學院,中正有台文所,無定較合這幾冬的走向,年底報名試看覓,經過研究計劃、筆試、口試三關攏真順利，算起來真好運,較意外的是:台語文差不多無用著，有一工問一個香港來的台文生:敢會曉台語文?伊講:會阿,「歹勢!」這句歹勢應該是真有代表性的台語。

學校九月中旬開學,多年來暗光鳥的生活習慣不得不調整,定定暗時一點倒落去,歸暝厝邊的狗仔吠、社區有人開電動門出去、囝仔夜啼,攏聽甲真清楚,下半暝才真正睏落眠,深深體會著習氣的歹改變。

班上只有十外個,聽講是有史以來上束結(註1)的一班,不過有四年級、五年級、六年級,嘛有七年級,四年級的大哥當選班代,七年級的當選副班代,無仝世代互相配合。九節課上甲腰酸骨疼的時陣,互相加油、鼓勵,毋通像二年的學長,讀一冬煞臨時辦休學,論文方向較早決定,才袂到時揣無題目。同學大部份是國中、國小的老師,即馬才瞭解:上課毋知影聽課的人艱苦!

 最近較少傳電子批聯絡,以前的班長講:逐家毋通疏遠去,嘛有同學問起重回校園的感想,本來部落格想欲歇睏一站仔,想倒轉來藉這個機會予逐家瞭解近況嘛袂粺,不過寫的量可能會較少。

 第一張相片是以前參小學同學做伙去中正大學,相機囥佇護欄自動翕的,想袂到有一工會來這進修,重做學生。

註1:束結即短小、精簡的意思。