哼一首- - -人生公路

越頭看行過的鹹、甜、酸、苦

頂禮拜去提處方簽

醫生問：血壓有順否？

量看咧，131、74。安全

醫生閣問：敢有其他的問題

有！一禮拜攏著食一包［起凊吶］的藥仔來止癢。

已經食超一年矣

會止癢、袂斷根。

醫生想想咧

叫我最近若有閒

來抽血、驗尿

做免費的健康檢查。

我無愛檢查，萬一若檢查出來有問題，誠費氣。

身體檢查就若像咧相命

因為相信、知影了後會影響心情

規氣遠離，毋知好了了

醫生用真堅定的口氣講：袂使得！藥仔食遮久矣，檢查看有影響著其他的所在否。

這个醫生，自我來斗六，有問題就去揣伊。

是一个用藥仔誠保守的醫生。

看伊遐堅定，歹勢閣講毋。

本成拍算早起去抽血。

昨暝暗頭仔就無閣食物件。

連欲睏進前彼杯酒嘛省起來。

三更半暝，倒手爿的跤癢甲精神

共家己講：一定著忍耐到抽血了，才食藥仔！加油！閣忍耐一下，天光八點外診所就開門矣。

提藥膏仔抺了，閣睏去！

毋知睏偌久。

正手爿的跤參倒手爿仝位的所在，又閣浮出來一堆。

我知影，這个症頭若招伴來相揣。正爿一搭、倒爿一搭，就毋是忍耐兩字會當準煞。

毋是袂堪得忍耐，是捌忍耐到走夜間急診，予醫生警告，這个症頭袂使得按呢忍耐，拖到尾矣，會休克。彼遍用兩支血筋佮滴一筒大筒的來收煞.。

半暝仔三點半。

只好放棄天光的身體檢查。

藥仔食落去，睏甲日頭曝尻川。

毋是好睏癖，是我對藥仔的反應

彼藥仔食落下到地

規身軀無力，干但想欲倒佇眠床

捌問皮膚科醫生，聽講這个症頭有特效藥？

伊講無，準有，以我對藥仔反應遮呢大的體質，嘛無適合。

倚晝，合唱班群組看著有人下晡的課欲請假

足想欲請假＋1

毋拘，合唱班上課，是我一禮拜內底上蓋快樂的時間，毋甘放棄。

阿母捌講：人若siān，毋通一直倒眠床，會愈倒俞siān。

勉強起來款中晝頓。

食飽出門。

課上落去了後，精神tsiâu來。

唱一曲- - 人生公路

下課，看著遮媠的一幕

日頭光愈來愈軟的尾仔暗時

景色會愈來愈媠

若像人生

愈活愈精彩

會記得讀冊時，老師捌講：莫道桑榆晚，為霞尚滿天

就是按呢。

遮呢美好的人生，為啥乜總有病疼來觸纏

我知，伊是來提醒

聽候轉去的時陣若到，遮个病苦予咱甘願放手

世間有苦嘛有甜

有生就有死

閣唱一遍 - - 人生公路

跤步行著輕快無比

* * *

起凊吶=蕁麻疹

siān=疲倦

tsiâu=齊