烏鴉佮天鵝

         有一隻烏鴉，逐工逍遙自在，過著快樂的日子。

         有一工，伊看著一隻天鵝，規身軀的毛是媠(suí)到白鑠鑠，

烏鴉足欣羨的，就向(ǹg)望家己嘛會當有遐爾仔媠的毛。

         烏鴉掠準講天鵝身軀的毛會當白kah遐媠，是因為伊定定佇

咧水裡，泅來泅去漂洗來的。

        就按呢烏鴉離開了伊所蹛的樹林，佮彼个就近就(tō)會當食

著物件的祭壇，遷徙(suá)來到湖邊，通方便洗身軀。

        從此以後，烏鴉足骨力洗身軀的，逐工拍拼洗koh出力

鑢，洗kah無暝無日、無食無睏，伊身軀的毛猶是烏的，毋是伊

一心所向望，親像天鵝遐爾仔白koh媠的毛。

        烏鴉干但顧咧洗身軀，攏無心情去揣物件食，無偌久，煞

來活活餓死也。                                           minda