風颱蘇迪勒 / 爸爸節

下晡，緊共門口的花徙予相倚，較會當擋咧風，

大欉的也缚予牢，當開的蘭花徙入厝內囥，

毋知風颱會偌大，防颱的工課一定愛做。

下晡有雄雄落一陣雨，落煞閣出大日，

阮這到這馬猶是無風無搖。                2015.8.7

昨暗翻點，有聽著雨聲，後來風雨漸漸大……，

倚三點的時，予門外佮厝頂尾pin-pin piàng-piàng

的聲音驚醒，風雨呼呼叫，有感受著風颱的威力，

天光後，風雨加誠恬靜，翁婿起床內內外外巡看咧，

講干但有盆花予風吹倒爾，其他攏平安。

倚晝，風颱就走矣，食晝飽，風大雨大，

電視有播出各地風颱的狀況，災情未少，

閣講風颱會帶來豪雨，提醒逐家要注意，

看來這風颱尾的威力猶是足大的。        2015.8.8

相片內的阿爸笑微微，好食物排規伊的面前，

阮鉸二枝盛開的石斛蘭送予阿爸，阿爸誠愛花，

伊一定足歡喜的。

今仔日更加數念阿爸，目睭若瞌起來，阿爸就佇面前……，

行起去五樓的親和室，上香祈禱後，虔誦真經迴向，

祈願阿爸在天靈體安康，佳節愉快。

攢暗頓的時，社區內的車道傳來陣陣的烘肉芳，

逐家佇風颱中過佳節，真特殊嘛是足有意義的。

                                                            minda 2015.8.8