提琴貝母蘭

三冬前，社區B棟的住戶，提一枝無根閣無葉十外

公分長的植物予阮，問伊是啥花？搖頭應講毋知影

，而且講是人予伊的，伊無想欲種。

阮隨共種落盆，經過半月日，看伊生根、暴穎、發

大葉，顧三冬後終於看著花莓，一工一工抽懸，花

莓沓沓仔展大，逐工金金看，期待花開。

今年五月底到六月初，雨水較捷，有時落足大陣，

有時毛毛仔雨。彼一工透早，雨落誠大，翁婿倚佇

客廳的窗仔邊咧看外口，雄雄影著，共阮講好親像

有花開矣，啊！無想講煞選佇落雨天來開花，今欲

按怎？種花人惜花，阮雨傘攑咧出門去看花，已經

開二蕊矣！花真大蕊是綠黃的色水，不止仔媠閣雅

氣，頭一擺看著這款花，心內有夠歡喜的，雨愈落

愈大真想欲徙入厝內，毋過規欉沃kah 澹漉漉，只

好先徙來大門邊覕雨。

雙手拭焦，緊拍開手機查詢，翁婿頭先揣著，花名

叫做提琴貝母蘭，真正是花媠名嘛媠。隔工閣開四

蕊，就按呢相連咧開總共十二蕊，足值得欣賞的。

落雨天媠花家己看，想欲招彼位B棟的住戶來賞花，

卻是毋知伊無閒對佗去，攏無看著人，另工若有來

行踏才予伊看相片。

                                 minda 2022.6.15

附註：

1、暴穎(pok-ínn)：植物體發出新芽。

2、花莓(hue-m̂)：蓓蕾。含苞未開的花朵。

3、抽懸(thiu-kuân)：抽高。

4、沓沓仔(ta̍uh-ta̍uh-á)：慢慢地。

5、影著(iánn--tio̍h)：看一眼、注意一下。

6、不止仔(put-tsí-á)：非常、相當的意思。

7、徙(suá)：遷移、移動。

8、澹漉漉(tâm-lok-lok)：溼淋淋、溼答答。形容含水量很高。

9、覕(bih)：躲、避。

10、拭焦(tshit-ta)：擦乾。

*提琴貝母蘭 (網資)

是蘭花的一種。它是在馬來西亞，蘇門答臘，婆羅洲和菲律賓發現的一種

大型的，熱生長的附生植物，在河流或陸地附近的大樹上發現，

具有間距大，受壓強，長橢圓形或近圓形，帶2根頂端，

褶皺，橢圓形的浮雕假鱗莖。