線(Line)

同窗會已經三冬無舉辦，初二進前佮退後e每一工攏好天，偏偏這工落大雨，事先報名e干但七、八个。進場以前拄著兩位較早e老師，姓名無定袂記哩，毋過教啥物課程抑真有印象。遠遠有人咧擛手，原來過去e死黨攏來ah，講敲電話確定我有欲來，無報名著走來，聽了真溫暖。

ㄨ慧佇美國蹛幾偌冬，伊e出現予逐家真意外，講起過去兩人佇蘭潭騎鐵馬相載，車擋失效e驚險往事，伊竟然袂記ah，枉費我共伊當作生死之交，可能伊無共這件代誌保存佇頭殼底重要e「資料夾」內面。

這濟冬來參加e人數抑是無法度超過二十个，逐家攏咧思考問題出佇佗位?後一遍欲安怎共人招出來。

轉來了後，相片用face book佮Line互相交流，阿東佇Line成立阮這班e群組，逐工早起、中晝參暗時，分三班「叮咚」開講無停，鬧熱滾滾，傳古錐e尪仔圖，阿東講若像一陣青春e歐里桑、歐巴桑，根據英國最新e研究，現代人愛到五十三歲才算中年，逐家亦是像ㄨ生講e：後青春期。

(2002.4)