老同學

半年前才開過同窗會,過年趁逐家有閒又擱見一擺面,一半是為著欲做伙探望經過劫難的阿東。畢業無偌久,×德佇國外發生意外,因為捌失去過,知影離散有時陣會來得真突然,連一句再會攏袂赴講,緣份著安爾切斷矣,所以特別珍惜。差一點仔爆肝的阿東,氣色雖然抑袂完全正常,但是又擱恢復孽骨的個性佮言語,逐家攏有較安心。

 餐會中間,投影片一幕一幕出現少年彼時的校園,佮逐家早年生澀的模樣,嘛有這幾冬同窗會的相片,引起講袂完的話題,有笑聲嘛有感歎,有互相漏氣嘛有安慰鼓勵。

 欲畢業的時陣,無閒咧準備就業、升學,開創未知的前途,無感覺同學中間有這爾親,出社會了後,才知影真正值得交陪的朋友並無濟,每一擺聚會攏感覺溫暖佮輕鬆,若像是無血緣的親人,因為唯熟姒彼日算起,同學的緣份甚至可能比親人擱較久,熟姒愈短的朋友,愈緊袂記哩,同學會當五冬甚至十外冬無聯絡,嘛袂予人刪除、放棄,因為有舊記智、舊相片、舊情份…。