目屎

有一冬小ㄨ失戀,兩個人去租一支世紀大悲劇—「羅密歐與茱麗葉」,按算欲大哭一場,可能是共生活經驗差傷濟,兩個人看了干但苦笑,無一滴目屎。

尾仔伊嫁去花蓮,生一個白肉、紅嘴唇的嬰仔,越若食牛乳擱越若會參人耍,毋過九個月大的時陣,乳母突然間敲電話來辭頭路,講嬰仔歸身軀掣無停,伊毋敢照顧,送去病院檢查講是羊暈,而且腦部會兜兜萎縮。囝仔目睭愈來愈無神,三、四歲抑擱袂曉講話。

有一工坐公車,囝仔看著這濟人,一時興奮大聲叫袂停,司機開始大聲嚷:啥物人的囝仔放予安爾大小聲!欲吵死人喔?伊見笑趕緊揤電鈴落車,凊采截一台計程車,關車門了後開始放聲哭。