君問歸期未有期
巴山夜雨漲秋池
何當共翦西窗燭  
卻話巴山夜雨時  
──李商隱〈夜雨寄北）

這是當年李商隱回答伊兮家後兮詩，一個離開故鄉兮人，接到厝裡兮批，問伊當時欲轉來，面對巴山落雨兮孤單暗暝，詩人用這首詩，對伊兮家後說出身在他鄉兮稀微，甲伊對重逢兮仰望，分離時兮寂寞心情，愛用偌濟力量來擔？恐驚著親像巴山落歸暝兮雨仝款，這呢大兮秋池，嘛無法度承受！

詩人有滿腹兮才情，挺好將伊兮情思寫出來，而且流傳千年、安慰著所有甲伊仝款遭遇兮人，是啊！千外年前，著有一個這呢有名兮高人，遇到這款兮苦楚、忍受仝款兮折磨，心裡會感覺卡安慰，猶原心酸、猶原目屎流，至少，不這呢孤單……但是詩人亦是幸福兮，伊也當等待，等待轉去故鄉兮時，甲伊家後坐佇窗阿邊「翦燭花，話巴山」，講當年落雨暝兮孤單、歡喜現在也當幸福相對看。

但是啊！坎坷世間路，有偌濟分離兮親人、愛人，佇每一個憂悶兮日子、每一個無星、無月兮暗暝、每一個鬱悶兮落雨天，孤單兮心情無地講起；猶擱有偌濟人，日日夜夜，思念兮心情無地排解，心內思念那個人，永遠不擱轉來，生離死別是人間上疼兮滋味，分離兮心情，敢是世間

上艱苦兮言語？人講：人生喔，哪←是親像咧眠夢，著是干哪一齣戲，有禍著有福、有苦嘛有甜；思念兮時，期待見面兮日子，擱卡情深義重，嘛難免要分開；佇台頂著認真搬戲、落台腳著愛越頭，毋通躊躇；春夢上美，總是會醒、月娘有情，嘛無逐工圓；一年有四季，敢有人永遠是春天？

每一個人，攏是詩人，悲歡離合、運命好歹，將伊準做時光咧運轉，是必經兮過程，不妨甲詩人仝款，寧可等待，等待時間兮輪阿，輪啊輪、轉啊轉，轉甲咱兮幸福到位，為咱凍惦……

哪暗呢，「分離」，應該是人生擱一個開始！

縱橫古今