透早五點外倚六點

精神去便所，順煞去灶跤滕一杯仔燒滾水

拄欲入去房間繼續睏

灶跤傳來一陣一陣怪聲

誠大聲，比人咧挵門較細聲寡

停一下、閣挵；停一下、閣挵！

斡頭去灶跤揣聲音的來源

是惟gá-su桶邊仔彼台茶車仔內底傳出來的聲
 

內底是啥？

敢會是一隻大貓鼠？

敢會是siān-ang-á【壁虎】咬著虼蠽【ka-tsua̍h 蟑螂】佇咧幌？

無、敢會是一尾大大尾的蛇佇咧踜？

愈想愈驚、愈驚想愈濟…….

共拍開看覓、毋敢！驚雄雄傱出來啥乜怪物。

Mài-tshap-i【不管她】

入去房間想欲閣再睏

電火毋敢切hua

房間電火光光又閣睏袂去

 

想起細漢彼時遙遠的暗暝

睏佇身邊的兄姊攏入眠

這時

灶跤吊佇壁頂的煎匙、飯lē、鱟hia、鼎蓋、水觳仔攏會出聲

親像有人佇灶跤無閒

這種情景定定有

佇驚惶中

我一直忍，莫huah聲、莫叫伊呀起床

毋拘，若像毋捌忍過

到尾矣總是大聲叫：伊呀、灶跤有人！

毋是一工抑兩工

伊呀用耐心伴我

毋是一暝抑兩暝

伊呀攏佇我huah出聲的同時

行出伊的房間

切開灶跤佮阮咧睏的間仔中央
門邊彼pha五燭的電火珠仔

共我講：看一下、無人honn！緊睏。

 

另日

又閣是兄姊入眠了

有人穿雨鞋的聲

行倚中間仔的門

大聲踏、細下挵

我嘛是一直忍、忍mài共伊呀吵精神

毋拘，嘛是毋捌忍過手

嘛是閣叫：伊呀、有人咧挵門！

毋是一工兩工

伊呀用耐心伴

毋是一暝兩暝

伊呀攏佇我huah出聲的同時

行出伊的房間

共兩扇門攏拍開

共我講：妳看，無人honn、妳緊睏！

啊！我親愛的伊呀

今仔日透早

足想欲叫：伊呀、有人佇灶跤挵門！

 

這斗是真實、毋是細漢時彼種幻聽

伊呀今做仙去矣

睏佇邊仔的翁婿

睏眠有障礙

助眠的藥仔食落去了後

就算共伊叫起來

伊嘛是愛睏愛睏

只有是等伊家己精神才閣講

 

等啊等

總算等著伊醒起來

：「咱灶跤茶車仔遐有怪聲，你來共拍開好否？」

驚拍開內底真正有啥貨走出來佇厝內費氣處理

伊共茶車仔捒出去外口

拍開茶車仔的門講：無啥啊！

 

我若像聽著幾何十年前，伊呀共我講：無啥honn、緊睏！