我真愛耍，自細漢就按呢，並無因為跤無方便就畏出去佚陶。

爬樹頂、灌肚猴、辦公伙仔、掠草猴。凡若我會曉耍的，逐項攏欲綴甲到。

阮阿娘看我定定耍甲無天無地，規身軀烏lok-lok，攏會唸我：天都無梯【thui】、若無汝連天頂都欲khàng爬起哩。

每擺阿娘按呢唸我的時，我攏會舉頭看天，心內戇想：無一定佗一工天公伯無細膩liù【遛】手，將梯落落來，我真正欲爬起哩看覓咧。若予看去一遍仔天頂，落來了後，我一定有講袂了真濟稀罕的代誌共阮阿娘展。

毋拘一直到今、天公伯毋捌遛手過，所以我嘛抑毋捌爬起哩天頂看覓；閣再講，準講我即馬有梯通予我爬起哩，嘛無機會展寶予阮阿娘聽矣，因為阿娘早我一跤步，去佇天頂咧等我！

 

結婚進前，若有機會旅行，就算請假愛看頭家娘的面色，三不五時仔我嘛是會為著參人去佚陶來請假。

半暝坐遊覽車去梨山，透早看著青驚的粉鳥，予人迮甲走無路，參加比賽的粉鳥予人攔閘，彼个歹人就佇我面頭前khà【敲】公用電話，參粉鳥主人講價數。彼遍的旅行，記持上深的，是頭一擺近近看著號做［歹人］的人（毋拘實在講，彼个人生做無成歹人）。

阿里山公路開通無外久，我就綴人坐遊覽車行公路上山，佇山跤辦公室已經是著開冷氣的熱天、到山頂暗時煞寒甲欲死，佳哉朋友借我伊加紮一領的雪衣，才會凍透早參人去看日頭出來的美麗。暗暝倒佇山頂的塗跤，看唯天頂，天星若像伸手就摸會著遐呢低。其實伸手是摸袂著天星的啦，毋拘手伸出去窗仔門，會當將雺霧掠入來的浪漫，是難忘的記持。

出外佚陶，是一層偌呢仔快樂、偌呢仔享受的代誌啊！

 

結婚了後，看翁婿無暝無日咧做空課，我歹勢講欲去佚陶，我心肝內彼隻愛耍的蟲，無張無持會趖出來餳我，我就閣共伊掠倒轉去囥佇心肝底。

 

囡仔離跤手了後，我心肝內彼尾愛耍的蟲又閣定定趖出來，便若看人欲去佚陶，我就會共翁婿講，我嘛想欲去。

伊毋捌講好、嘛毋捌講毋好。

毋拘我看伊的面腔，知影答案是啥乜。

 

囡仔去台北讀冊了後，下班轉來，斡入來巷仔，有時聽著翁婿做空課機器的聲音、有時伊佇二樓拍球的聲音、有時伊佇電腦前唱歌的聲音。

我反應真鈍，斡入來巷仔了後，厝裡的聲音漸漸仔予恬靜、恬靜代替去，我猶毋知影彼是翁婿身體出問題的前兆。

厝裡愈來愈無聲，一擺規禮拜，伊攏毋出聲，等到我知通驚，問伊是按怎，伊講我都攏毋參伊講話，了後、伊就定定走病院。

朋友建議我，儘量tshuā【帶】伊出門行行咧。

 

舊年熱人，復健會一年一遍的旅遊，我硬叫伊參加。

伊人參我出去矣，神魂毋知飛去佗一tah【搭】。

去景點，定定攏講伊無愛落車，欲佇車頂歇睏。

每一擺我攏毋肯留伊佇車底。出來佚陶，毋是彼行行、遮看看咧？

我耍甲真快樂，暝時睏甲真落眠。

我講過，我鈍，毋知影我是踏著伊的病苦咧快樂。伊規暝無睏，我當做是認舖。

轉來了後，一個月tah-tah【整整一個月】，伊咧暈車。

有時是我咧上班的時接著電話：汝轉來載我去注射好否？

有時是暗頭仔：汝載我去予醫生看好否？

有時是黃昏：汝緊載我去急診！

檢查、抽血、照腦波。攏無按怎。

若像有一隻魔神仔，覕佇烏暗的所在創治阮；上無、嘛予我一个病名，就一定有藥仔通醫治敢毋是？

 

醫生予阮的，是看袂著天光的答案。

有的醫生講：我已經提上好的藥仔予汝矣，閣食袂行，我嘛毋知欲按怎！

有的醫生講：我袂當閣按呢定定共汝注射，驚khàm【勘】掉汝真正的病因。

欲按怎？未了未盡的拖磨，我到底會當按怎？

 

尾矣聽醫生佮朋友的建議，去大病院揣醫生！

欲成年矣，佳哉伊藥仔哪食哪減量，身軀哪來哪生肉。

 

自我足少年的時，阿爸就捌共我講：心肝內數想的代誌，若是無可能實現的時，彼尾欲望的蟲，就愛共tēnn【捏】予死。

 

這個月台語會去旅行；我無報名。

下個月復健會欲去澎湖；我無報名。

我共用一、二十年的［無通去］，改做［無報名］

【無通去】是無奈會怨命。

【無報名】是隨順無怨命。

 

這一年來心情的轉變，真大；是伊的病苦啟示我！

平安兩字，是世間上好佚陶的光景。

內心無限感謝天，逆境了後予我寶貴的平安！

 

頂工伊突然共我講：另工載汝來去旅行！

我講予佇天頂的阿爸聽：阿爸、彼尾蟲我無共伊tēnn【捏】死、只是放生。

敢會是彼尾愛耍的蟲、徙去佇伊心肝內？！

我若像看著阿爸予我一个微笑的鼓勵！