「炮仔聲，催阮著來起行…..」

巷仔底厝邊兜嫁查仔囝，一排tshia-iānn的烏頭仔車，綴著炮仔聲來起行。

看著新娘車uì【對】阮門口過的鬧熱，我想著的是送新娘出門的阿娘。

我無生查仔囝，毋知嫁查仔囝的心tsiânn，往過看阮阿母嫁查仔，想講一定心真疼；若無哪會每一遍新娘車起行，阿母就覕佇房間目屎流袂suah。我是厝裡上落尾出嫁的查仔囝，我嫁了阿母瘦落一身肉，我知影、我是伊上深的牽掛！

人講手抱孩兒才知父母時，我反應較慢鈍，知父母時毋是手抱孩兒彼時陣，是佇囡仔大漢離開厝去台北讀冊的時，才知彼心疼親像割心肝ínn仔一陣閣一陣。

囡仔細漢時，不知不覺將全精神囥佇伊身軀頂頭，等到伊大漢離開阮身邊，加出來一大堆的時間，袂曉創啥！

佇伊抑未出外進前，我總是想講，到時極加共加出來的時間提來看冊、提來練琴、提來聽講經．．．。時到，以早無時間做閣足想欲做的代誌，煞一點仔都無心情去進行。

尤其若是khà電話囡仔無接的時，咱是六神無主，像欲掠狂的痟狗！

這種情形予囡仔誠大的壓力，伊定定講：媽，拜託你去tshuē一項代誌來無閒，較袂佇遐烏白想。

有一擺囡仔轉來，拄好彼時讀虎尾科技大學的怹表兄tshuā一位李同學來厝裡，參怹開講的時共怹講，佳哉囡仔欲台北進前有共阮兩個老的教用即時通，予阮加一個方式知影囡仔的消息。囡仔應講：早知莫共恁教，恁足厚操的！

李同學講伊足欣羨別人的爸爸媽媽會曉用電腦，伊參怹哥哥攏離開厝裡，無人教怹媽媽用電腦，所以怹媽媽若閒干單會當盹龜看電視佮踅街買物件。李同學捌手機仔設定錯誤，接袂著任何消息，伊媽媽人佇台南，著急甲khà打電話請警察幫伊去學校找囡仔。囡仔人敢會了解，面對情況不明的時間，是偌呢仔難渡佮為難？！

我會對囡仔遐厚操，一半是個性，一半是因為伊去台北進前，誠無自信，捌共我講足驚台北的囡仔看無咱草地人。

後來囡仔uì台北轉來的時我問伊，你以早煩惱講台北囡仔會看無咱的代誌，敢有發生？

伊講：喔！逐家攏嘛足親切的。

我講：著啊，你若予我知影你過了足好的，我無事操煩你欲創啥？

我總是毌甘放手、siong【傷】慢放心。

會記得伊細漢時，驚仔伊食飯食袂好勢，逐頓共伊飼，到伊讀國小，我嘛是共伊飼，我足盲目的，無看著家己的囡仔已經大漢矣。一直到有一站仔歇睏日我攏去上課，足久無參怹兩父仔囝鬥陣食飯，有一工雄雄看著囡仔家己會曉舉箸，感覺足意外的。怹阿爸講：這哪有啥，莫驚伊食甲滿四界，予伊家己來，伊自然就會曉矣！

有時陣咱的操煩是加額的。

頂工囡仔轉來，參伊開講，講起伊拄離開彼一暗，我khà電話予伊，問伊盈暗食啥？伊應講當咧啉一杯豆奶佮食一塊包仔。我會記得彼時的心情，真毋甘就大聲應伊講：媽媽佇當時捌用這款物件予汝做暗頓？

彼時伊無應我，這遍講起伊才解說講：彼是因為彼下晡有社團來招去參加活動，一人分著一份暗頓，伊閣有買別項參咧做暗頓，啊我聽著講食豆奶佮包仔就大聲喝，所以伊無閣講啥！

囡仔佇外口的頭一頓，我佇心內毋甘幾à年，才知彼是我加操煩的。

最近有朋友欲嫁查仔囝，佇網路透露伊的歡喜佮毋甘。我共伊講：對囡仔、祝福hē較濟咧、操煩減較少咧！

這句話我嘛收佇家己的心肝底！學習對囡仔放心、學習對家己的操煩放手！