Hit年的今仔日，佇咱故鄉護龍的竹栱仔厝，透早冷風kôaⁿ-sih-sih，伊呀kōaⁿ一khian腹肚圓圓圓，無閒款早起、無閒送阿姐出門讀冊去，閣無閒tshih-tshih lêng一kha phun桶去飼豬。

無閒soah伊呀緊緊入去房間眠床倒，阿爸走來pak灶跤佮iap-á中央彼片門，giâ去鬥佇pún-chiâⁿ bô 門的房間做房間門。

無偌久庄內的產婆來咱厝，房間內底傳來嬰仔咧叫啼：「哇！哇！哇！」

哈～哈～哈～真歡喜！咱厝又閣加一个紅嬰仔來做阮的小弟！

佇我出世的第二年，也就是我度晬彼時陣，咱厝裡的笑聲佮幸福的氣味，佇逐家迮我一雙袂行的跤迮甲紡見去。汝的出世，將我共厝裡紡見去的快樂抾倒轉來，算來、我實在愛感謝汝。

佇汝的頭前有1个哥哥4个阿姐，厝裡每一个人共汝惜命命，汝古錐九怪、又閣趣味，定定lāng甲規家伙仔笑hi-hi！

彼時咱厝裡足散的，真罕得有魚肉通食。

有一年虱目魚著災【tse】，一般人家少人敢買來食，價錢真俗；咱散赤人毋驚死，阿爸去買轉來予伊呀煮。

伊呀疼囝毋甘食魚肉，魚肉留予囡仔食，伊呀家己啉魚仔湯；想袂夠慈母的心意，soah予啉湯的伊家己得著較濟的營養，這是伊呀想袂到的代誌啊。因為營養有夠，予伊飼汝的奶水kóng-kóng流，伊呀後來講：彼時的汝，suh奶suh甲足歡喜，suh甲一半會舉頭起來共伊呀笑一下。

我予囡仔食過母奶，足會當體會彼種囡仔予阿母笑一下的感動，毋是文字會當形容的滿足！

汝食母奶食甲會曉行的時，阿爸佮伊呀中晝若唯田裡轉來，伊呀佇灶跤無閒煮中晝頓，汝一隻竹椅仔抈咧綴【tòe】前綴【tòe】後，嘴裡一直叫：「伊呀、椅仔坐坐啦！伊呀、椅仔坐坐啦！」

伊呀知影汝是欲食奶，特工共汝創治講：「予恁爸爸坐！」

阿爸應講：我抑無奶通予食矣！

真是一段偌呢仔使人懷念的幸福歲月啊！ 

等甲汝會行會走的時，二姐會揹袂行的我、牽汝佮恁四姐仔四界去佚陶。

一擺汝得著真嚴重的［白喉］。

這个症頭佇當時誠僫醫，是真危險的病症。

無論日時，無論尾暗仔、無論透早，我定定看阿爸用鐵馬仔載著手裡抱汝的伊呀，四界去看醫生、揣收驚，一日走幾何位。

伊呀暝日抱著汝，毋敢睏，目睭金金看著汝，真驚汝雄雄貧惰喘氣。

我的記持內底，下面這段是空白的；這是後來聽二姐咧講起：

二姐講汝會著白喉，伊真自責。

因為有一遍伊揹我、牽汝，參厝邊的囡仔，欲去表叔［牆叔仔］怹的宅仔偷挽拔仔，都抑未挽甲半粒拔仔咧，聽著牆叔仔遠遠咧喝：猴囡仔、咧創啥！？

一群猴囡仔「嘩！」一下走了了。

二姐揹我，汝綴佇後面一直傱，汝細漢跤短人矮，傱到一个懸懸的圍籬仔跳袂過來，二姐佇頭前緊張甲欲死、囡佇遐跳袂過來嘛真驚惶。

後來按怎？二姐講過我袂記得矣。

總是彼日轉來了後，汝就發燒、汝就著白喉症頭。

彼段汝就醫的日子，是咱厝裡烏陰天的日子。經過真久的時間，汝才逗逗仔好起來。

咱厝裡6個囡仔，無一个是平平安安大漢的；佳哉干單我有留落來症頭一世人都無才調復元的【無期徒刑】，予厝裡人的操煩嘛上濟。我看著咱的序大人，佇遇著咱生命裡的無平安，總是頭犁犁走傱閣走傱，毋捌怨嘆、佇咱脫離危險的時，舉頭感謝天。

阿爸共哥哥號做［如新］、共汝叫做［維新］恁捌因為名字，兩兄弟仔咧論啥人較新，哥哥講伊叫［如］新，永遠假若新的，當然伊較新；汝講汝叫［維］新，永遠維持新的，當然汝較新。其實我嘛分袂清恁兩人啥人較新，只是好奇咱阿爸咧號咱的名的時，頭殼內毋知按怎想。無地問嘍！

總是，這凡間所有的代誌攏是相對性的物仔袂永久。有新一定有舊，嘛無永久的有阿爸佮阿母。

汝佇父母佮眾兄姐的疼惜當中大漢，都抑無予人sēng pháiⁿ 去。

汝考高中的時，分數考真懸，挺好去真好的學校讀日間；汝為著咱家庭經濟無好，所以選擇咱蹛附近私校的夜間部讀，日時去工廠做工。學校的老師看著汝的成績，感覺汝讀私校夜間足無彩，汝抑是甘願自降級數讀這間私校。彼時我佮恁四姐仔嘛讀這間的日間，恁四姐仔看汝讀夜間，嘛申請轉去夜間讀；這人生講起來嘛真無天理，惟一留佇日間讀的我，本成是考著夜間部，學校老師看我［無方便］予我［方便］准我轉來讀日間。看小弟小妹攏咧賺錢矣，我猶是閒人一个，真歹勢啊！

佇汝的生日想起往事種種。

祝汝生日快樂、日日平安！

汝的三姐仔寫佇2013.01.29(咱人12月18日)