9月尾，ㄚ昌老師共我講，怹國樂團12月會佇靈山寺演出。

差不多成個月了後，才知影ㄚ昌老師講的彼間靈山寺，原來是這一二十年來，我定定經過二水鄉佮民間鄉的路裡彼間寺院。

彼時開始，逐遍úi遐過，總會加看一下。心內想講，佇遮有一場國樂之約。

阿勳共我講，看起來內底樓梯真濟，咱行起來驚仔有困難。

ㄚ昌老師講伊會chiâu一个停車位予我好停車。

..........  ...........  ..............

今仔日中晝阿勳開車，載我佮好朋友阿美去靈山寺。

開入去寺院，向工作人員表示，阮行路無方便，佗位停車較適當。

這時、一位生做瘦瘦、面容慈祥的出家人行倚，講伊欲chhōa阮去停車。伊佇車底接一通電話，共對方講：我即馬欲chhōa真重要的人客.....。

阮予人看做重要，實在不敢當，閣有講袂出來的溫暖。

車底載著這位出家人，出大門斡唯一條小路仔爬山，路足細條，路邊停滿咧落樂器的車輛，這是載樂器的車專用的路。若是我家己來，看著這款細條路閣起崎，我一定毋敢行。佳哉有阿勳開車陪伴。

節目開始，ㄚ昌老師介紹靈山寺住持的時，阮才知影，chhōa阮唯後山來會場的彼位出家人，原來是致中法師，失敬、失敬！法師對待人客的謙虛佮週至，使人感動。

天公伯有看顧一陣認真做代誌的人，天青青、雲薄薄、風絲仔吹來拄拄好，這種天氣，是天賜咱欣賞優質樂團演出的下晡時。

主持人活潑的言語、樂團精彩的演出。予阮真歡喜有福氣來參加這場［靈山論樂］；形容好聽的音聲，華語講：『餘音繞樑三日不絕於耳』，阮頭殼內這个音聲，定著會佇這一年踅無停；明年、閣來去！

到這時、我猶感覺［靈山論樂］敢會是一場夢？

是啦、這是真的！傍ㄚ昌老師的福氣，阮是一个幸福的聆聽者！

感謝靈山好緣！