離頂一遍參加復健協會旅行，已經是十外外年前囡仔猶細漢時的代誌矣。

彼个年代遊覽車無復康巴士，參加的會員大部份行動力攏抑閣真溜掠，小部份的人坐輪椅，上落車工作人員愛抱起抱落，輪椅嘛愛扛【kng】起扛落；彼時翁婿阿勳講伊看人為咱遮辛苦，伊看著真艱苦；後來因為空課無閒佮種種原因，阮就毋捌閣參加復健協會的一年一擺的旅遊。

最近幾年復康巴士出現矣，上落車毋免閣赫辛苦。

幾何年前就想欲叫阿勳鬥陣去參加，一直無行動；囡仔畢業了後留佇台北食頭路，有時轉來看阮的時，定定叫我愛較捷招爸爸去佚陶，若無關佇厝裡會緊老。

今年、伊總算答應報名參加。

我的個性較愛耍，報名了後一直咧期待，像囡仔等待遠足彼款的心情。

等著出發的日子得欲到、毋拘風颱嘛來矣。

天秤風颱佇台灣尾趖【sô】幾何工，預定出發前兩工，風颱抑無想欲走，心肝綴風颱的路線浮浮沉沉，想欲去閣想欲放棄的意念，佇頭殼內底滾絞，矛盾的心情佇理事長宣佈旅行延期時，規个心肝才平靜落來。 

出發彼早起，早早就起床；天公伯有照顧、無風無雨。

復康巴士來的時，想講上早到位的阮，的確會使撿一位四是四是的座位；工作人員阿榮講：袂使得、愛照名單坐。

原來天秤仔來亂一下，延期了後減一台復康巴士，而且這台復康巴士是唯台北倩來的，用一般遊覽車改裝做復康巴士，輪椅無法度倚近座位，會曉家己行徙的人安排較後背的座位，需要工作人員抱的坐較頭前。因為是唯台北調來的車，聽講價數加足懸，規台車會員交的錢，無夠付這台復康巴士的費用，理事長講，為著欲予會員平安旅遊，不惜重資共開落。真好運，我參阿勳攏抑會行徙，所以讓出來頭前坐後面；工作人員唯輪椅抱行動無方便的會員坐車位，看著內心感慨濟濟。有偌濟人一年一擺綴協會出來佚陶以外，無機會出門。我知影有一工，我嘛會愈來愈無力、我嘛會身不由己。老化、佇小兒麻痺患者的身上閣較明顯、閣較快速，才幾年爾，一个仔一个體力退化，需要輪椅輔助的人愈來愈濟。 

旅行的過程像人生，有時拄著家己合意的好光景、有時行向咱無合意的場地；若拄著無合意的，我就綴人罔行罔踅；拄著我合意的，就享受其中的感動。

頭一工下晡佇屏東瑪家看原住民唱歌跳舞，怹的歌聲赫呢響亮清氣；怹的舞步赫呢有力好看。曾國校仔一遍去日月潭看原住民跳舞了後，我就深深愛著原住民的舞步；數想若有一工會當共拐仔掞掉，我一定欲去學跳山地舞（當然、這是戇人講戇話）。 

暗時蹛旗山大衛營度假會館，彼暝佇會館廣場有團康、魔術表演。其實這毋是我這咧年歲合意的節目，毋拘團體活動，總是捧場一下，予人看著人頭，其實是佇會場邊仔參好朋友開講。

一个少年矣行倚參我打招呼。這个所在會遇著熟悉的人嘛真無簡單，伊哪會佇遮？伊是我工作單位退伍的替代役男，拄經過一場人生的變故。佇伊退伍無幾工的一个早起，伊老爸開遊覽車載人客去北部，歇睏的時人昏倒，送到病院已經救袂轉來。伊講怹阿爸欲出車進前，都才參伊開講爾，哪會知影無常遮緊來。伊想欲接伊阿爸的事業開遊覽車，這遍是綴怹兜的車出來見習，伊講過一站仔資歷若夠，就會使出車載人客。伊參阮囡仔平濟歲，有人講這馬的少年仔是［草莓族］，其實並毋是。我拄著真濟怹這沿的囡仔，捌代誌閣肯承擔。親像會員中有一位朋友囡仔已經咧做醫生矣，這遍陪伴怹阿母來參加活動，幫忙愈來愈無體力的阿母完成旅行，佇這个年歲的囡仔，肯陪伴序大人出門的已經真少矣，所以看著更加感動伊有孝的心。 

會館無障礙斜坡有較崎，家己無才調操作輪椅起落，步步愛工作人員幫忙，所以廣場團康未煞，為著欲閃避散場的人群，阮參朋友提早離開。入去會館內底，聽著輕柔的鋼琴聲，原來是每禮拜六有人佇遮現場演奏；坐落來欣賞，享受抾著的浪漫。點一首［花心］來聽；音樂的力量極其深遠，音樂散場到樓頂了後，聽著有人咧哼［花心］的旋律，聽著感覺真心適。

準備歇睏時，一位工作人員來挵門，交待阮愛細膩，因為拄才有會員跋倒送院。

啊！哪會按呢？工作人員的壓力一定足大，帶領五車共殘黨出遊，平安兩字是上大的心願。

舉拐仔行路，隨時都有跋倒的可能，以早我捌佇餐廳因為一搭油湯跋一倒，所以這遍出外，借一台輪椅來坐，行遠路、入餐廳加足安心。佳哉跋倒送院彼位會員後來平安無代誌，第二工猶參阮繼續未完的行程。

佇大衛營會館一暝好睏，一點仔都無認舖的失眠。透早天猶未光，一粒光映映的月娘走來佇房間的落地窗探問，共我叫起床。一目眨【nih】仔天光月無明，山頂較涼冷，摱一領外套落去樓跤後埕聽鳥聲、看山邊的彩雲。山頂的鳥仔，參厝邊彼條溪仔早起時的鳥仔唱著無共調的歌聲，攏真好聽。

早頓佇會館地下室用餐，因為場地無濶，分兩梯落去用餐；阮予人安排佇第一批，準若連食飯都綴人袂著，按呢就毋好；所以鳥仔唱歌閣較好聽、景色閣較嫷，嘛袂當停留傷久。坐電梯欲去3樓時，頭一擺家己坐電梯上樓，才發覺電梯無坐輪椅專用的樓層選字枋。坐佇輪椅傷矮，揤袂著【按不到】3樓的位置，欲按怎？佳哉房間鎖匙圈仔掛一个長長的壓克力，用壓克力延長我的手。是講、是按怎遮呢大間的飯店，電梯細細隻，干單會當載一台輪椅，閣無殘障者使用的選字枋仔？原來這棟大樓是三、四十年前的建築物，予打高爾夫的人會員制使用的飯店。是啦、就像佇車底聽一位朋友講伊人按呢講：跛腳盪幌參人佚陶啥？三、四十年前殘障者往往是覕佇厝裡，少人行出來外口行踏的啊。 

第二工頭一个行程是參觀佛光山佛陀紀念館，紀念館占地足闊，長長長的走廊，壁頂烏色的大理石刻著施主的名；會記得一擺佇診所候診室，聽一位出家比丘尼參一位信眾對話，信眾講伊定定捐錢做功德，比丘尼提醒：咱做好事毋好定定提起。彼句話伊輕輕仔講，卻是重重囥佇我的心肝頭。

紀念館上蓋吸引我的，是室外彼排青青青的柳樹；參好朋友欲佇柳樹邊翕相的時，一位出家師父行倚，伊幫阮翕相、幫阮捒輪椅。伊翕相的表情足媠，穿袈裟嘛會當遮呢媠啊！我提相機想欲共伊美麗的面容翕落來，伊堅持講：莫翕我！

尊重伊想法，無將伊美麗的面容翕入去相機內底，卻是印佇腦海明明明。雄雄有一種想欲綴伊出家的意念。

柳樹翕了，綴人踅啊踅。看著一間內底有一尊金身釋迦佛，拄才幫阮翕相的師父佇門口招呼阮入去，提一个圓圓細細發光的光明燈，予阮供佛。

毋知按怎，看著金身佛像，內心叫一聲：世尊。目屎煞滴落來！緊緊離開現場，抑是去外口看柳樹較自在。 

第二工下晡去義大購物廣場。哇、這間百貨公司夭壽大間，干單等電梯就等足久足久，真濟人行甲毋知通倒轉來集合的所在；我是路痴，毋敢行傷遠，干單參朋友佇L1彼層踅。

干單踅這層就會凍踅足久閣踅袂透。

參朋友入去一間服裝店，兩人各自買一領洋裝。結數的時參店員滾耍笑：阮有殘障手冊哦、會當優惠否？

殘障的生命，已經修練甲會凍提家己的欠點來參人講笑矣。當然這是愛有共殘黨朋友佇身邊我才敢按呢做。

復康巴士駛離開義大廣場無偌久，佇路邊停車停真久；原來是別車抑有會員佇義大內底踅袂出來，佳哉後來平安上車。

暗頓、捧一杯果汁當做酒，向同行的朋友說謝、感謝陪伴；杯仔捧起共阿勳講：多謝你！

伊講多謝啥？

多謝無愛出門的伊，伴佇身邊，予阮耍甲真放心。

上蓋感謝協會理事長佮辛苦的工作人員：多謝恁，予共殘黨一个平安的旅行。

寫於2012.09.07