塵世茫茫，是甜是苦在天創治人，毋敢回想的，來入夢。

掠準已經袂記得了了的往事，最近佇眠夢一直來戲弄。

離別苦，彼時毋知這是人生一定愛經過的路途。

厝裡唯庄跤搬去台北稅厝徛了後，干單學校歇寒歇熱，我才有機會當轉去厝裡蹛。一來路途遙遠、二來無量剩的錢通定定坐火車。每一遍的歇寒抑歇熱，轉去到台北總是去無共款的所在，佇台北稅厝五、六年，搬厝搬六、七擺，搬甲鄉愁無地囥，搬甲相思揣無路通倒轉。

開學前幾工，臘日仔一直掀，共阿母講：一年蹛佇厝裡無幾工。

臘日仔一直算：閣百外工，才會當閣轉。

阿母外表冷靜心毋甘。

阿母從來毋捌叫我愛認真讀冊，干單共我講，毋好像伊毋捌字，一世人做青盲牛，摸無路。

欲去學校註冊彼一暝，半暝三點外，阿母共我叫起床，予我食一碗伊〔敲一粒卵落下煮的冬粉湯］，阿母煮甲真好食，毋拘因為湯頭內底有離別的味，到今、我猶是無啥愛食冬粉湯。

食了冬粉湯，二姐揹我，阿母伴我，去巷仔口閘計程車，坐去台北火車頭。彼時火車猶未電氣化，買上俗的普通車，上無著坐七、八點鐘才會到彰化，彰化火車頭坐公車到和美，和美閣坐三輪車去仁愛，後來無幾年三輪車消失佇街路，就改坐計程仔。足驚袂赴學校註冊的時間，這種驚惶，這馬才知影，已經深入骨、刻佇心肝。

＊＊　＊＊　　＊＊

蹛佇和美仁愛學校六年，少年時袂曉計劃，國中畢業參加聯考時，考高中、考五專攏佇中部報名、考試。

五專考著一間理想的學校，毋拘無宿舍，愛佇外口稅厝，獨立生活；行動無方便的我，只有選擇放棄。倒轉去台北想欲找學校，成績無理想，會當選擇的無濟。

找一間厝附近的學校讀，逐工通車。

透早的火車頂頭，學生仔tsinn規車，冊揹仔一kha比一kha較大kha，定定揣無空間予我徛。有時陣會予顧月台的工作人員會叫我坐下一班車。

我無愛遲到，毋是為著欲遵守校規。

是我的教室佇四樓，無電梯。一層一層爬到四樓尾溜，驚人看，所以選擇較無人的透早。

一擺爬樓梯的時，搪著衛生組長，是一位外省阿伯。

伊用真重的外省腔問我：「幾樓啊？」

我應伊：「四樓！」

伊講：「啊～這麼不方便讓你在四樓？跟我來、我帶你去跟主任講。」

戇戇仔綴伊行，徛佇辦公廳外口，聽伊參人講一大拖，尾仔聽伊踅踅唸....無人答應伊替我的求情。

我共伊講：「沒關係、四樓就四樓，我可以爬上去！」

彼个年代，殘障者的權利無啥人重視。無論好天抑歹天，我毋捌缺席。佇畢業的時，學校連一張全勤的賞狀嘛無愛予我，講我...毋捌去上體育課。

自卑的心情做怪，我家己放棄上體育課；體育老師是退休的籃球國手，伊唯同學遐知影我會影拍桌球，一擺共我講，我若落去體育館拍一擺球，我的體育分數欲幾分在我要求。佇仁愛學校每一位同學攏是［共殘黨］，桌球拍著自在；佇遮干單我攑枴仔，佇眾人面頭前拍桌球，若像予人看我咧變猴弄，我無彼咧勇氣。所以無答應體育老師的建議。

無提著全勤賞狀的心情，彼時真不服。即馬想起來，奚嘛是我家己［驚歹看］的結果啊。

 ＊＊　＊＊　　＊＊

彼年4月17是拜五，下班轉來共飯煮好，拍算暗頓食飽款著歡喜的行李，第二工欲參台語會去佚陶；阮翁頭一遍答應佮我出門參加活動，撥開空課、閃過歹天，等著一個好耍的日子。

下班了煮這頓，並無豐沛，報紙是我的私傢菜，提報紙來配飯；芳芳的蕃薯飯捧倚欲棓[pe1]落下，電話響起．．．阿爸的聲：「恁伊呀倒佇眠床跤，我一個人無才調處理．．．！」叫伊打119，講已經打予蹛附近的大姐。講起大姐是一个軟汫的阿姐，毋拘因為是大姐，所以厝裡發生啥代誌，伊一定得做頭前去面對、去處理。問阿爸閣有打予誰？伊講除了打予大姐，干單會記得我的電話。我蹛上遠，打予我，除了著急，我是一點仔都無辦法。阿爸將電話舉倚予伊呀，叫我參伊講話，阿母干單低低應一聲，無才調講啥；我聽伊含糊的應話，內心浮出〔中風〕兩字。

電話掛掉，打予小弟仔、二姐、哥哥佮小妹。該通知的電話打了，我嚨喉像鎖匙鎖牢咧，飯、一嘴都吞袂落。內心像幾何萬隻蚼蟻咧踳踏，勳仔看我著急，交代講血壓的藥仔先食一包．．．。伊擔心有高血壓的我，袂堪得緊張。我共家己講，路、抑誠長，愛先共情緒穩定落來，才有氣力閣再行。

小弟仔打電話講已經將伊呀送病院。我包袱仔款款了，去火車頭等車。前一班上北的火車拄走、下一班愛等成點鐘。哥哥佇這時陣電話打來，講伊坐著高鐵矣，閣五十分鐘會到台北。妹妹嘛傳簡訊，講伊火車十一點會到台北，伊會等到我到位，參我做伴坐計程車去病院．．．這時才感覺蹛斗六真無方便；無高鐵、台鐵車班嘛誠少，而且愈晏車愈少。心內著急，恨身軀無插翅通飛。蹛庄跤所在的無奈是我家已選擇的；自會捌代誌就足驚父母年老，當初家己戇想，想講嫁予離厝千里遠，就會當使閃開父母年老彼時的傷心時陣，想袂到離愈閃牽掛愈深、思念愈長。

 ***  ***   ***

夢醒

現實的世間已經行過我失去父母的痛疼，無啥乜代誌是會赴、嘛無啥乜代誌是袂赴。我好像聽著阿母唯佛國傳來毋甘的叮嚀：「我佇遮等你、你寬寬仔來、免趕！」