PS：文中標楷體請用華語發音 

拜六下晡行入去美容院，頭家娘問我欲鉸啥乜型？我嘴應講隨在你，心內想講好看痞看已經無要緊。 

阿母予病苦觸纏徦已經無啥會認得我是誰，囡仔嘛已經去台北矣，勳仔的目睭毋是咧無閒做空課、就是椆佇電腦的螢幕，問伊穿這領衫有好看否？伊免看就應講：「好看！」頭鬃鉸了轉來問伊有嫷否？嘛是無看就講：「嫷！」 

我的頭毛自然虯，髮禁時代耳上一公分的彼粒頭，講有偌痞就有偌痞，會當講是痞徦火車無愛予咱坐。好親像欲彌補做學生仔的時頭鬃夆髮禁的遺憾，自高中畢業了後，我真少共頭鬃鉸短。干單有一擺，阮囝猶咧讀國小，彼工我去美容院，伊參怹阿爸咧冊局看冊等我，我鉸一個短短短的頭鬃去找怹，囡仔看著我，表情足奇怪、聲音強欲哭講：「媽媽、足痞看！」佇冊局裡伊一時仔看冊、一時仔看我，講幾何擺：媽媽、足痞看！ 

轉來到厝，掠我看一時仔，猶是講：「媽媽、足痞看！」 

其實彼擺鉸了並無蓋痞看，我後來有想著為啥乜囡仔會這呢袂慣勢；因為自伊出世，看著的媽媽攏是長頭鬃，雄雄變一個短頭鬃的媽媽，伊一時無法度接受。 

自彼遍了後，我毋捌閣將頭鬃鉸短。 

最近天氣真熱，心情亦無蓋好，囡仔去台北讀大學了後，無閒功課、無閒球隊、無閒伊家己的代誌，媽媽的頭鬃好看否已經排佇伊心肝內尾尾尾強欲看無的角位仔。我找無予家己心情返好的理由，就提頭鬃來出水。 

但是，敢講真正嫷痞無關係？若按呢，為啥乜讀冊會時，予嫷姑娘仔呵咾我一句：「汝鉸短頭鬃有嫷！」聽著心情像飲一杯薄酒按呢微微仔醉？ 

做學生的時予教育體制共咱髮禁十外冬，畢業了後堅持毋鉸短頭鬃，敢毋是家己予家己另外一種的髮禁？ 

學習放下……唯頭鬃鉸掉開始！我按呢戇戇仔想。 

註 解

下晡：下午 

欲鉸啥乜型：要剪什麼型 

頭鬃：頭髮 

痞看：難看 

觸纏：糾纏 

有嫷否：漂亮嗎 

自然虯：自然捲 

夆：被 

無蓋痞看：不很難看 

袂慣勢：不習慣 

返好：轉好 

出水：出氣 

按呢戇戇仔想：傻傻的這樣想