無半欉樹蔭遮閘的青紅燈跤，超過一百秒的紅燈等候，「心靜自然涼」的名句提來這無效，專心看紅燈一秒一秒減少的數字，邊仔彼台載一個查某囡仔的老母，雄雄罵伊查某囝，大聲閣歹聲嗽，眾人掠伊看。敢講紅天赤日頭會共母心的慈愛曝凋去？五六歲的囡仔嬰會參伊有啥深仇大恨，著佇路頭大聲責罵？

青燈起行，我綴佇彼台機車後壁，下一個青紅燈停起來，老母唯查某囡仔的正跤跤腿巴幾偌下、巴甲我的正跤略略仔起痛疼；閣起行，機車哪行抑咧拍，的確是正手愛摧油，換用左手唯查某囡仔的跤腿捻幾偌下。我毋知影我會當創啥，干單戇戇綴伊機車一直行，回神才發覺已經超過我欲去的目的地一大段，我是咧迮啥？唉！放怹行……！

想著頂年仔的熱天，嘛是日頭赤炎炎中晝時的青紅燈跤，一台機車邊仔兩個細漢囡仔咧哭，怹的阿母咧pìnn（搞）彼台袂行的機車，我好心倚問伊敢有需要幫忙？伊掠我看一下，的確是看我行動無方便袂當創啥，大聲應我：「汝無才調啦！」彼兩個囡仔聽怹阿母大聲，哭聲停一睏仔囝，繼續哭……我紮一粒受傷的心，往上班的路起行。

近來讀著善導大師講的兩種決定深信：「一者、決定深信，自身現是罪惡生死凡夫，曠劫以來常沒常流轉，無由出離之緣。二者、決定深信彼阿彌陀佛，四十八願，攝受眾生，無疑無慮，乘彼願力，定得往生。」我漸漸仔明白，「汝無才調」這句話對我來講是合su的！佳哉～～承佛願力，定得往生～阮的無才調，願交慈佛拍派！但是彼粒予日頭曝甲強欲凋去的母心咧？