引用文章參與並缺席了一場音樂會之後

原來穿上合腳鞋的感覺是這麼棒……好朋友默然佇伊的網站按呢寫，這句話寫入去我的心肝底。 

阮細漢時蹛庄跤，囡仔人少人有鞋通穿，彼時我嘛猶未穿鐵鞋，我的叔伯阿兄有一雙球鞋傷細雙袂穿得，阿爸抾轉來予我穿。我的跤無力，無縛鞋帶仔的鞋我袂曉穿，彼雙鞋有鞋帶仔，逐工透早欲落眠床進前，先佇眠床邊仔穿鞋，一擺阿爸唯伊房間出來看我咧縛鞋帶仔，共我詼〔khue〕講：「咱厝裡有一個古早人咧縛跤哦…」，阿爸抾予我彼雙鞋，是我人生的頭一雙鞋仔。入學讀冊了後，阿爸買一雙烏色的塑膠鞋予我穿，彼雙鞋仔有一繚束仔橫過跤盤束起來。因為雙跤無平大，倒跤會穿得、正跤傷大雙，平時鞋勉強穿無問題，厝裡去學校的路無舖點仔膠〔瀝青〕，落雨天規路的路糊糜仔會共正跤傷大雙的鞋仔揪椆咧，行一步、抾一下鞋仔，像咧參塗跤相搶這雙鞋，小妹仔總是陪伴佇我身邊慢慢仔等我。放學時間阿母會將田裡的穡頭放咧，走來揹我。 

我大漢了後阿母共我講伊遠遠看我行一步、抾一下鞋仔，看著心肝疼、鼻頭酸、喉管淀tinn7，我是伊可憐的心肝仔囝。毋拘彼時我一點仔都無感覺有啥可憐呢，大概是因為無閒咧抾鞋仔吧？ 

嘛因為落雨天上課無方便，國校四年阿母送我去仁愛學校讀冊（佇遐才熟悉默然），入學進前去病院做身體檢查了後，醫生建議我愛穿鐵鞋，一穿宛若穿欲三、四十年矣。 

蹛台北時真利便，欲做鐵鞋直接去鐵鞋工廠訂做就會使得；嫁來這了後，欲做鐵鞋足費氣，附近無鐵鞋工廠，若欲做一雙鐵鞋，唯量寸尺到試穿佮修改，往往愛走兩、三畷才完成。一、二十年來攏是透過阮遮復健協會請外地的廠商來的時才做，以早穿慣勢台北鐵鞋工廠的鞋仔，佇遮每一遍換鐵鞋，總是愛用成十工的時間來適應，機車上落時足痛苦，掠準這是必須忍受的痛苦，毋知影問題出佇廠商。 

一直到今年年初重做一雙，協會換新的廠商來雲林縣替阮做鐵鞋。聽講換足久矣，因為我久無做鐵鞋，離頂一擺做鐵鞋欲成十年矣，新廠商段先生唯報價、量寸尺佮試穿等等的流程，參以早的廠商作風無仝，完成的品質加真好，我想欲愛嫷，無想欲閣穿烏擼擼像靴管彼款的皮鞋、想欲有較嫷外型的皮鞋，段先生建議講，外型會使做較幼秀咧，色水抑是烏色的較適合，因為一雙鞋愛穿真久，別項色緻久來變色顛倒痞看。我聽專家的建議，鐵鞋做好穿落去，我實在毋敢相信會有這呢好穿的新鐵鞋，一點仔都無適應的問題，隨穿隨會當自在行踏，敢是咧做夢？抑咱是出運矣？合跤的鞋仔總算予我找著矣。 

頂工坐佇勳仔邊仔，伊頭一擺詳細看我的新穿鐵鞋，我共展寶講：「嫷honn？」伊講：「若講嫷，參市面上人流行的鞋仔閣差真濟咧；毋拘參以早的比起來，已經加足好看矣！」好穿閣較好看，我已經足滿足；是講....阮貪心按呢想，一雙合跤的鞋仔，若閣有無障礙的路來行，人生路會閣較完滿；準若閣有健康的雙跤來穿好行的鞋仔，當然閣較讚嘍；我知影，我參默然攏毋敢按呢數想．．．．