雖然早就知影人生不如意的代誌佔較濟，拄著逆境，心情抑是鬱悴看袂開。 

機車騎咧亂亂hui，敢有一個所在，會當共憂悶敁開？ 

踅到市內一間服裝店，店門口一領白色的洋裝掛佇衫架仔，欲暗仔的風輕輕仔掀著裙尾飛呀飛，飛出浪漫的姿勢。皮包仔內底有紮寡仔錢，會當買一領仔媠媠的洋裝通來添滿內心的空虛。 

落車看衫，一位顧店的中年查某人唯內底行出來，自跤到頭掠我看一遍，冷冷講：「阮遮無菜市仔貨，攏是專櫃的高級衫！欲買內底閣誠濟....」伊講煞行入去內底吹冷氣。 

心情都無好，予這句話鑿一下目屎險險仔流出來。 

機車繼續行，想著一位即馬蹛米國的查甫同學，拄出業無外久來找我，身穿一領白shirt〔襯衫〕尻脊骿畫一隻猛虎，我呵咾彼領衫媠，伊講買彼領衫的故事予我聽。 

彼一工伊去踅街，看著這領畫一隻猛虎的shirt真合意，問頭家外濟錢？頭家應伊講真貴、汝買袂起！ 

阮同學聽著隨應講：「共包起來！」就按呢，伊將身軀所有的錢仟外箍提出來去買彼領衫，二、三十年前千外箍一領衫，毋是凊彩人買會落手的，閣無講是拄畢業的散赤學生仔，阮彼位同學為著無愛予人看無，賭氣買起來。 

我拄才夆用話鑿一下，嘛足想欲賭一口氣共伊講：我買．．．．。 

但是我無，我知影看咱無起的人，閣錢予趁，無咧戇閣。 

其實伊看著的，是我騎機車遮日頭咧穿的一領舊衫仔，舊衫內底的衫是穿一領大姐佇專櫃買予我的洋裝呢。是講人若看咱衰痞，咱掛一綰珍珠人嘛共咱看做老鼠仔屎。 

我未出嫁時大姐定帶我去買衫，伊的眼光好，知影我穿佗一款衫較適合，因為舉拐仔身材參普通人無仝，阿姐會提我的衫去夆改較合軀才予我穿，一直到即馬，我已經嫁來這二十捅年，阿姐佇台北看著適合我穿的衫，嘛會買起來囥等我轉台北時提予我穿，我穿插簡單袂揀穿，家己買衫的機會無濟，嘛貧惰踅街。 

罕罕仔一擺想欲買衫，煞夆鄙相菜市仔貨。 

暗時講這層代誌予勳仔聽，我講足想欲共伊買一領貴貴貴的衫予伊雞喙變鴨喙。 

勳笑笑講：「抑有這戇的，汝應該是去另外一間店頭，買一領高級的衫，穿來伊遐踅予看！」嗯！好步數……。 

想想咧，煞煞去，衫有通穿就好莫討債，欲買，我抑是來去買菜市仔貨穿著較自在。上無，菜市仔賣衫的人嘛較有人情味！