2023.01.01寫

環島的夢，佇一、二十年前就鑽入來腦海中，一直毋捌放棄。

知影愛無礙計劃佇2022年12月初欲用手搖車去環島，我選佇11月中旬退休，欲追環島這个夢……雖然後來、無全程跟隨，只有片段織夢，猶是滿足、感恩！

轉來成禮拜時間，每一暗夢佮清醒之間，猶是佇咧環島的路途中，敢是神魂無綴轉來？

用相片閣行一遍行過的路，看神魂徘徊佇佗一个角落。

12/04

不老、無礙。勇創騎跡手搖車車隊，對斗六六房媽出發，我騎機車陪騎到北港奉送車隊啟程。

真濟人有環島的夢，只是無勇氣去行。有愛無礙協會志工做伴，咱就毋驚。

這工中晝佇虎尾糖廠媽祖宮食飯，真濟朋友來送車隊啟程，我想、每一个來送出帆的人，大概嘛有人抱著環島夢，只是種種原因，無法度綴咧行。

我參朋友綴到北港，本來車隊欲入去拜拜，拄好有人別間廟來鬧熱，炮仔放甲規天雲煙散霧，人tsinn人，險仔綴無去。

佇北港參車隊分開，一群熱血的志工、陪伴一陣行動無方便的人，一路行19工，路況會按怎？天氣怎變化？無人知。路途的辛苦是一定的。

.....祝福怹出帆、一路平安！