2022.11.11寫

111.11.11聽講這个日子誠特殊。

雖然我較慣勢用西元年，但是今仔日對我來講，是特別的。

退休老人的第1工。

天未光就精神；5點捅仔。

閣睏

閣精神；6點。

敢毋是講退休欲睏予夠氣，哪會一直精神？

規氣起來共早頓囥落去電鍋。若是著上班的日子，這時陣款欲出門當無閒。

今、免上班，無啥好攢。

7點食飯配報紙，慢慢仔食，食甲8點。

9點共阿勳講..我想欲出去行行咧。

伊問欲去佗？我講：無限定去佗，會對林內彼爿行。

機車騎向伊呀佮阿爸安歇的社頭山區。

去幾何擺矣，猶是揣無路。

有人報我行山腳路，山腳路已經行足久矣，看無記持當中入口的牌樓。差不多問過5个人（孤狗講的我聽無，毋知影伊是咧講東西ah南北）。看著路邊一擔賣菝仔的，倚共買，順煞問路、問去田尾仔的路。我已經放棄上山揣伊呀佮阿爸。

菝仔買了、路問好勢。起行都無到100公尺，入口的牌樓就佇正手爿。

彼是一條邊仔攏是土葬墓仔埔的路，塔位佇經過闊莽莽墓仔埔的山邊，車騎佇爬崎的山路，騎一站仔，機車發出抗議的聲，想講頂年仔騎超過十年的舊車，閣載二姐都有法度爬起哩啊，這台算新車呢，應該無問題。

偏偏仔就是有問題。

就佇上落尾一个崎仔，機車罷工。緊順勢攄去路邊樹仔跤，車靠佇路邊敲電話。

這台車會熄火的症頭，佇牽新車的初期就定定有。共車行頭家講，為著車會熄火，我半暝仔眠夢都會夢著咧顧路，伊講安啦！妳都做妳騎，全台灣去到佗，若tiâu車妳敲電話予我，我會叫附近熟悉的車行去處理。

：「頭家、我車閣顧路矣」

：「啊妳佇佗？」

：「佇社頭公墓遮。」

：「妳去遐創啥啦！」

尾矣、伊講這所在伊拄好無熟悉的，叫我請路邊的人幫忙一下。

路邊的人....？攏埋佇塗跤，怹若會幫忙我、我毋就驚死。

我知影車tiâu佇這所在，請伊幫忙真為難伊，就共伊講我家己想辧法就好。

啊辧法咧？

敢欲叫阿維來？

毋通，伊來嘛干單會當共我載轉去，機車咧？

敢欲揣附近的車行？

倒一杯茶，遙敬父母安歇的塔位，問講：伊呀！哪會按呢啦？

茶啉落、機車閣發看覓咧。

噗～～行啊！

毋敢閣爬崎，返頭，衝落山。衝去田尾仔阿維遐。

對田尾仔欲轉來斗六的時，驚仔像頂遍，一點鐘的路程行兩點鐘，想欲行大通路。阿維用孤狗的街路圖，報我看到佗著愛正斡.....照阿維講的路線落去行，成點鐘就到厝矣。原來行彼條小路仔會迷路，是因為路標若是寫［林內］，我就綴伊行，想講林內離斗六無偌遠，毋知影若是小路，是差非常的遠。路痴對路標，總有參人無仝款註解。我就是！

轉來到厝一入門，我電腦桌頂囥一支新的口琴。

阿勳講：這支予妳用。

看起來誠貴的口琴。

問伊偌濟錢？

伊講錢的代誌妳莫問.....

有感動著哦。想袂到個性遐呢儉的伊，甘得買遮好的口琴予我做退休的禮物。

講著禮物。

這禮拜我攏上半工的班。

拜三早起共停車場的搖控器提還科長，共伊講偆拜四半工，我就免來矣。

因為閣有休假未歇，所以正式退休日進前我就免上班矣。同事有聽著我第二工半工爾。彼下晡私訊予我，問講敢會使第二工較慢一、兩點鐘才走？參同事開講一下。

看著訊息，想足久攏無共回。

想講欲共拒絕；同事一場。想欲答應；我足袂愛這款場面。

伊一直閣傳私訊過來，講科裡的查仔囡仔足辛苦，私底下籌備足久矣。

落尾看著敲電話來。

因為當咧團練口琴，我無方便接電話。

驚伊一直敲，就共回：好啦！但是愛低調！

伊講好、低調！

結果昨中晝這場惜別聚會，看相片嘛知，哪是低調？禮物濟甲我戰車載袂轉來，同事替我載轉來。

同事知影我飼兩隻貓，就共禮物送予貓。

看遐大堆的物件。我講：啊恁攏毋驚我無答應出席？

怹講：妳若無來，阮就送到恁兜去。

三位同事陪我轉來厝裡開講。怹離開了後，拍開大大張的卡片，每一位同事佇頂頭寫祝福的話，看日期，成十工前就開始寫矣。竟然攏無一个人共我透露這場聚會。想著誠毋甘，最近怹業務誠無閒，閣撥工買禮物、寫卡片，真為難怹的是，閣著毋通予我知影。

頂禮拜參幾个仔同事招退休的娥姐去食飯。講是替我辦的退休趴。體貼的查仔囡仔，知影我愛買杯仔、嘛愛貓。就送我貓仔造型的杯仔。

這馬的少年的，頭殼轉了誠緊。禮物攏送甲心肝內底去。講袂出來的感動。

退休遮呢幸福、連阮兜的貓仔嘛傍我退休的福氣，貯滿櫃仔的四秀仔，毋捌遮富裕過。

看怹貓草食了，佇塗跤翻腹肚的歡喜，敢會使加退休幾--遍矣？