2022.09.04寫

每一擺愛無礙協會的可玉若問講：翠苓姐妳要參加嗎？

無論活動內容是啥，我攏先應講欲參加。

因為我真愛耍，嘛想講協會欲辦活動，較濟人參加較鬧熱。

頂日仔可玉閣問我，協會有欲報名參加馬拉松，敢欲去？

馬拉松？用啥方式？

有人用跤行、有人捒輪椅。

我無才調行、輪椅捒袂遠，伊講欲替我安排手搖車。

好哦！手搖車換一个所在耍。

這兩工一直咧看消息

風颱天，敢會取消抑是延期？

攏無。

通知禮拜方早4:45佇協會集合。

按呢著較睏咧，早早就倒佇眠床，雨聲卻毋放我入去夢中，一直來攪吵。

予我想東想西就是無想欲睏。

這種雨，是欲按怎耍手搖車？

穿雨幔會翕甲規身重汗、若予雨淋著，鐵鞋仔入水著穿規禮拜澹澹的鞋仔上班。

鐵鞋的鞋是黏死的，袂當換雙。半暝仔想著這，緊起來準備塑膠橐仔，萬一落雨通共跤包起來。

咦～啊若出日咧？想著這，又閣起來攢手套佮tshiú-lông（袖套）。

就按呢，起起落落，略略仔睏去，倚兩點又閣精神。

共家己講，緊閣睏一時仔.....

一直到寄3:20鬧鐘仔起床時間咧響，我攏無閣睏去。

4點捅仔出門。

天暗暗、雨咧落、路無人，暗時的台三線哪會這个形？

無膽的我，足想欲欲勼倒轉去眠床覕咧較穩。

毋拘協會有人咧等我欲出發，我哪通這時陣講無愛去？

十捅公里的路裡，相閃身的車一隻手指頭仔都算袂了。台三線的夜，哪會遮稀微？大概是半暝又閣拄著落雨天。

為著我欲用一台手搖車，協會著做的工課加真濟。

想著歹勢，想欲放棄，閣想講，協會從來毋捌嫌咱費氣、干單煩惱咱毋出門。

我參加10K，手搖車驚去Ａ著人，所有的跑者攏出發矣，我參捒輪椅的理事長才開始行。

一路微風吹動，鳥聲陪伴，我定定罷工的鼻仔竟然鼻會著路邊樹仔發出來的芳味。落過雨透早的農博，原來遮呢迷人、遮呢芳。

tuè（跟）佇跑者的後背，看怹衫仔攏是流汗的澹，咱手搖車實在真輕可。因為呢，雖然協會有備電池予我用，我煞歹勢切電來輔助我搖較緊、較少力。

昨暝想的雨水、昨暝想的日頭，攏缺席。烏陰天，足讚！

原來有時陣生命中的困難，是家己想出來的。

來到終點，一个小姐提獎牌予我，笑微微共我講恭喜。

我想講，這大概是怹今仔日迎接每一个跑者攏會講安慰辛苦的話吧。

真枵，去領一盒餐點。

先去便所，出來才佇樹仔跤歇涼啉茶、享受我上愛甜甜的食物。

佇便所聽著大會叫著［張翠苓］。

想講，仝名吧，叫張翠苓的攏真愛耍。

一遍去阿里山過暝，蹛佇青年中心。規暝有兩个人開講袂煞。

其中一个一直叫：翠苓、翠苓。

第二工起床，有人怪我參人講話講遐uànn（那麼晚）。

冤枉。彼遍對台北到阿里山，一路坐車忝甲我足早就睏矣，哪有參人講話？看著鬼！

原來是仝團的，嘛有一个叫做翠玲、但是彼毋是我。

一點仔都無想著人是欲頒奬予我。

我猶是啉我的茶、食我的物。

一直到廣播講：愛無礙協會的張翠苓。

啊！這聲無去認注袂煞。

第4名..閣有一包紅包，獎金100箍。

感謝愛無礙協會總是毋驚麻煩，一直tshuā（帶）阮行出來，參與這个精彩的世界。