2021.04.04寫

三月中旬厝裡的人來斗六聚會，拄著小妹仔著去掛紙，伊tsua̋nn綴無著陣。

頂禮拜一參妹婿仔來。中晝欲食的攏佇伊厝款好、煮好紮來，共我講青菜予我款就好。

怹總是按呢，毋甘我做。

會記得伊呀在生的時，若一半擺仔來斗六，看我咧煮，攏會毌甘。我共伊講，無人像我煮食遮輕可，坐咧煮呢！

參小妹仔食飽了，咧開講的時，講著妹婿仔細漢的時著逐項做，煮飯、飼雞煠豬菜。小妹仔講伊會捌代誌的時，咱厝就無咧飼豬仔，所以伊毋捌款過豬菜....

聽伊按呢講，我內心tshia̍k一下。

伊毋是一直攏佇我身邊同齊大漢的？

阿維欲出世彼日透早，伊呀捾phun飼豬仔了後，才入去房間生囝，這一幕，毋就干但我看著爾？

厝裡欠政府的tsînn-niû（田賦）無繳，來討稅金的人封條提咧，貼對房間的柴櫥，間仔彼台鐵馬仔、灶跤掀桌頂看看咧，蕃簽飯配菜脯，無啥好貼，落尾去豬牢（豬圈）貼一張。tsînn-niû無繳，遮个貼封條的物件攏袂使振動。彼種被追殺的感覺，小妹仔嘛無驚著？

人講十年一世代。小妹仔才少我兩歲爾，看起來，佇猶毋捌代誌的細漢時，一年大概就會當做一个世代矣。

細漢的時不如意的代誌，毋知應該嘛是一種幸福。

妹婿仔退休了，看起來加真少年，滿面春風。

伊退休了的生活真自在。透早泡一罐茶，去山頂經營伊家己的［快樂農場］。伊講佇罕呢有人行跤到的山頂，吟詩、唱歌、khoo-si-á，流一身汗了才落山。

伊平時仔嘛參小妹仔參加漢詩吟唱。

捌佇網路看怹表演［春江花月夜］，我問小妹仔，彼呢長，又閣是用台語，是按怎記會起來？

伊講tsia̍p唸就會記得，閣來欲唱［琵琶行］，當咧記…

欽佩！

原來記持無好，毋是老抑是少年的問題，tsia̍p唸就會記得。

按呢若驚失智，咱就來唱歌、吟詩！