Contents ...
udn網路城邦
林內.逍遙
2022/06/22 15:42
瀏覽193
迴響0
推薦9
引用0

2020.04.20

禮拜早起手搖車欲去林內路裡,經過一坵田,代先鼻著一陣一陣腦海中,足熟悉又閣真遙遠芳味,紲落(接著)看著一坵黃梔仔花,這个芳味參有温暖囡仔時的記持,毋捌袂記得。

看著花,想欲提手機仔起來翕,車隊一直向前行,驚仔綴袂著陣,只好將花囥佇田裡。
車隊佇林內鄉四界踅,攏講讀萬卷書不如行萬里路,阮無咧讀書,出門行行看看咧,閣較重要,林內原來嘛遮呢闊。
早起對鄉公所一直到阮欲離開林內,替阮導覽的人腹內真有膏,七字仔不管時出現介紹內底,想欲記錄起來,跤手siuⁿ慢頓,袂赴記。
佇寶隆紙廠(未來林內驛站)是由鄉長親自替咱介紹,講著這所在未來的發展,予阮若像已經行入去一个足四序、足適合障礙者出入,安全的公園。雖然我無可能會用著,總是有快樂的期待,內心就會有淡薄仔歡喜bùn(鑽)出來。
林內佇我蹛的隔壁鄉鎮,我卻對伊真生份。經過導覽解說,才了解這所在真正是一个值得咱深入行踏的鄉鎮。
行佇每一个所在,感觸誠深。我閣會當有幾遍,行踏佇這个土地咧?年歲濟是一个問題,身障者的體力,落坎若咧落山崎,我欲佇體力lu落去崁跤進前,好好仔耍一下。
最後一站𤆬(帶)阮去食蘇家臭豆腐。自本就愛食這,毋拘食會合的擔仔無幾个。這擔我有合意食。
去每一个景點,會想講離厝近近ah爾,另工家己閣來看覓咧。
上想欲閣去看的所在,就是- - -早起看著彼坵種梔仔花芳芳的田、會當看著日頭落海的poh-huānn(河堤)、理事長𤆬(帶)阮行細細條仔又閣長長長的密境、佮彼間臭豆腐店。
我路痴閣無膽,準講孤狗大神會共咱報路,路邊無代無誌會傱出來吠人的狗仔,參加隊鬥陣行,無咧驚,若家己行,就毋知欲按怎閃伊矣。
ah是把握這久當咧行的路較實在。
愛無礙的工作人員有夠𠢕揣所在予阮去ká車,這幾禮拜行落來,嘛見識理事長人面有夠闊,去到佗位都有伊熟似的地方頭人,予阮真大的方便,點心、正頓予阮食迵海的。
倚晝的林內芋仔冰、長青食堂的中晝頓,佮一碗一碗臭臭臭、我愛食的臭豆腐。
誠歡喜,這支歹去的鼻仔,這遍真乖,無論芳的、無論臭的,伊攏予我鼻透透。

有誰推薦more
全站分類:心情隨筆 心靈
自訂分類:散文..台語文
上一則: 花純白、想老爸
下一則: 合用的鼎

限會員,要發表迴響,請先登入