毋好亂講話

2016.08.13

熱天時仔暗頓煮好，灶跤若烘爐，無論煮的物件有偌好食，攏袂想欲食。

這時陣，出去溪仔邊吹一下仔涼風，是世界讚的享受。尾暗仔溪仔邊的風，真涼！是講家己一个佇遐，我較毋敢。

頂工，經過厝邊，看伊坐佇客廳的椅仔.....
：「小姐！咧創啥？」
應講：咧看bang-ga【卡通】
問伊：好看hioh？
看一个頭鬃參我共款白一半的查仔人咧看bang-ga，煞笑出來！伊嘛笑出來。
講：「無啦！都無聊。」
：「哈～我嘛會看呢！行啦，電視切掉、火切hua，出來行行咧。」
　
看伊手貼一塊藥膏，問伊：做siunn悿齁？
伊講：「跋倒啦！」
　
伊咧做貼大理石的工課。
頂工去做一个90外歲往生阿婆仔的墓。
阿婆仔怹囝是大企業家。
用五百外萬造一个媠媠的墓園。
　
伊講：咱這做工仔的歹命人，看人按呢開錢，有欣羨、嘛有感慨，就共工伴講，往生矣，做遮好的墓敢有意義？
　
話講出喙無偌久，就摔落去塗跤兜。
：「平路跋倒？」我好奇問伊。
：「hènn啊！共工伴講，若像有人咧搝我的跤！」
工伴聽著，緊雙手合十，對墓仔內底的阿婆仔講：失禮！阮烏白講話。

聽伊講了，溪仔邊彼港風，特別冷！