<<台文雜記~~望幽忘憂>>
    

      春天袂寒袂熱氣候清爽，就是愛會曉拆日，緊傱出去看山看海，吹涼風欣賞媠媠ê景緻啦~~
      頭一站"望幽谷"軟風微微仔吹，藍色的天有清氣的白雲佇咧散步，茄仔色的鼓吹花佮足濟喝袂出名的野花一tshok一tshok，遠遠清淨的海面船影點點，沿海步道坎仔懸懸低低，踅--一--輾......尤其面對(微笑山谷)彎彎喙型，定著予人掛慮掃除，心情清爽，果然名聲透頂港"望幽谷上忘憂"~~
      第二站"番仔澳"看海湧，摸會著海水，鼻會著海味，看會著奇石.....佮大海握一ê手，欶著新鮮空氣，隨在海風弄鬖(sàm散亂)頭毛，日頭曝燒身軀，手機仔猶是無閒咧揣鏡頭，翕甲毋甘停睏，攏是欲證明阮和友志相佮捌來遮tshit-thô(遊玩)過啦。
      第三站掠枵(餓)食海產囉~炊小管仔，海菜酥餅，鰭魚羹湯，糋軟殼毛蟹，煠青菜和落尾彼站星辰公園(碧砂魚港)啉咖啡，開講，看遊輪，歇睏....等等攏是袂䆀(不錯)的"浮生半日閒"遐爾仔消--遙--樂--暢。

106.4.21