擔頭看，滿天滿海

若珍珠ê天星

逐蕊，攏是上帝

閃爍ê目睭

閣擔頭看，無邊無界

無限ê太空裡

家己ê來時路，凡勢仔

干焦賰一寡仔坱埃......

逐暝，我攏按呢

咧眠夢，雖罔悲喜交插

有時，煞連歲月粒積ê霜雪

都溫暖起來

啊人，到底是

啥物款ê性命？

這張比字紙閣較薄ê形影

總是，愛揣一塊鏡

才會感覺袂孤單......

天河，茫渺

頂世人ê我

敢猶原閣佇遐？

註解：

擔頭:tann-thâu，抬頭。

坱埃:ing-ia，塵埃。

(陳胤/時光練習/2018/2/8)