阿文自小漢就無爸無母，隴是由阿嬤「粒接」﹙拉拔﹚甲伊飼大漢的。阿嬤身世有夠可憐，早前老伴因為愛飲酒，有一工落雨暝顛顛醉跋落ㄟ大水溝，隔重工透早乎人發現時已經魂歸離恨天囉！又擱隔一年，孤漢子阿順仔甲怹新婦兩翁某隨香團作夥坐遊覽車四界廟寺去拜拜，不幸在返來山路落階時「擋仔」﹙煞車﹚失靈擋袂條栽落山崁腳，歸車的人不是死就是傷，怹兩翁某卻作夥在死亡的名單當中。

好佳在出代誌彼工，阿孫文仔拄好﹙剛巧﹚感冒發燒無帶在身驅邊留惦厝乎阿嬤照顧，幸運逃過這ㄟ劫數，嘛為王家香火留落來一條根脈，出山彼工才有人通捧斗，算是不幸中的幸運。

嘸過這ㄟ囝仔天生歹受教，阿嬤管毋法度，車禍的賠償拄好通納清厝的貸款，政府亦有補助，倆嬤孫仔儉腸耐肚日子勉強度得，三不五時厝邊嘛會互相招呼照顧，但是阿嬤勞碌命閒袜落心，時常四界撿字紙、收壞銅舊錫，一個囝仔放乎滑哉蹓蹓去，到讀小學猶原猴死囝仔性袂改，常常就甲同窗打甲大孔小字，到尾全校老師當伊是頭疼人物，三番兩次軟的鯁的步數用盡，到歸尾後放隨哉伊去，盯條若嘜出代誌就算阿彌陀佛囉，一直到六年畢業，校長甲老師才大大吐一口氣。

出業了後家己找對”烏督拜”﹙摩托車﹚店去學做黑手，三年功夫學還袂透卻真正淪落做三隻的黑手，有一工半暝趁頭家歸家口出遊時偷牽所有的機車用發財仔請人運去作壞鐵仔賣，查著抓去派出所時承認犯案，但是錢總用對茶店仔間甲請一碇烏面獠牙兄弟凱了了，一角銀隴無存。

因為未成年交付保護管束嘛無啥路用，顛倒此後變本加厲繼續為非慘作，歸身驅又擱赤龍參加角頭做七桃人，暴力討債、市仔口強收小生意人的保護費…入監獄袂輸出入灶腳，阿嬤管無法每工是目屎準飯吞，厝邊頭尾同情伊處境隴會行腳到去伊厝陪伊、苦勸愛想乎開，畢竟當作是前世相欠的債，這世來討還，後出世寄望通有好的輪迴。

話懵話啦！安慰是一時得闊心而已，倒返來的現實你猶原要去面對。這一工阿嬤目睭皮「皮皮挫」，才心魂袂定甲厝邊老同姒透露伊的不安時，彼下晡果然一大隊憲兵警察袂輸追找江洋大盜將怹厝團團包圍住，問阿嬤您孫有返來無？阿嬤驚甲嘀嘀突突話講袂清，帶隊的刑事組長這才講：「您孫代誌舞大條囉！暗殺守衛的阿兵哥並且搶軍用的卡賓槍。」作案動機甲搶槍到底要做啥用途目前無人知影，但是已經引起軍警大大的緊張，正在全力大規模搜捕當中，怹希望阿嬤「堵」著孫時拵會當勸伊出面來投案。…

阿嬤自知影這代誌了後，每工食嘸晟食、睏嘸晟睏，歸ㄟ人變甲憨神憨神，三兩工便消瘦無肉若親像鬼，三頓是厝邊苦勸飼伊才食兩咀，若嘸是按呢穩當活活會去飫死，可憐喔！食老還擱為孫操煩老歹命，誰看嘛隴ㄟ嘸甘嘎。

半個月後傳來的消息是怹孫阿文仔已經過生，這條新聞鬧甲足大，電視二四小時播送，無人敢親咀對阿嬤提起，但是猶原管區來甲通知這嶄不幸的消息：彼一工阿文乎五、六個刑事當著，因為現場撂搶來的槍四界掃射，刑事全力還擊時當場將伊亂槍打死，後來經過檢察官驗屍確認了後，現此時冰藏在殯儀館內底，要阿嬤即時趕緊去領屍結案。

阿嬤聽著如晴天霹靂哭甲無聲慘死，由警察車陪載去殯儀館完成一切該辦的手續，了後當場惦火葬場火化存一付骨頭灰捧返來厝，碎心甲嘛嘸依照傳統替伊找一位靈骨塔安置，卻跑去當初時老伴淹死的大水溝「ㄧㄚˊ」﹙撒﹚乎隨放水流失，並且連續跪站彼歸瞑歸日，好親像對翁婿的魂魄作著上無奈、上悲情的哭訴。

這家口王家的香火就到這來斬斷囉！哎…阿嬤續落是要按怎過著存尾後有體無魂的日子？命運實在有夠猴戲弄人，這咁是就親像咱人所講的：人生是一場空夢嗎？嘆啊！非常的令人苦嘆啊！