台語詩-高雄站到囉

洪步浪2011.10.10

.

台北你若揣無食，

搬來高雄穩好額。

毋旦厝價俗一半，

天氣蓋好人親情。

台北生活若困難，

勸你放眼南台灣。

頭路好揣薪水懸，

開業生理做袂完。

道路大條通八方，

捷運快速四界通。

好山好水大高雄，

歡迎逐家做家鄉。

.

誠濟人親像歌手林強彼條"啥物攏毋驚"內底的主角，攏總相爭欲去台北拍拚，無疑誤一世人拍拚得來的，只是予資本主義吞食落腹爾爾。故鄉敢著毋好?庄跤註定無出脫?南部敢著輸北部?

行佇旗山舊街，我看著安土重居的南部人，對田--裡挽來的幾項菜蔬、芎蕉、老薑擺佇路邊，人按呢嘛是咧過日子。一碗當歸鴨麵線45箍，滿滿攏是鴨肉。三杯飲料60箍，若是佇北部絕對愛超過100箍。美濃人閣較是按呢，一塊祖公仔放落來的田，幾偌代人攏蹛佇遮種作。土地是上好的頭家，你付出偌濟氣力，伊就發偌濟薪水予你，就按呢，代代生湠，開葉散枝。