賞一葉蘭想著鴻妙上人

 
    恩師鴻妙和尚愛好蘭花，伊家己嘛有細間的溫室種蘭，佇阿里山慈雲寺
看著罕見的一葉蘭，就想起上合意一葉蘭的恩師。
    恩師佇1993年阿彌陀佛聖誕彼一工圓寂，算來13年過嘍，恩師對徒弟疼
愛關心親像序細，所以對伊的思念無輸我親生的父母。
    恩師少年就佇竹溪寺禮眼淨老和尚出家，奉師公的命令駐錫北港朝天宮
，負責誦經祈安、神像開光、割香戛（khat4音渴）火、早晚課誦。一
蹛30年，本身學禪，修持準提法，接觸的攏是傳統拜神的教徒，問的攏
是家庭平安、身體康健的代誌，恩師是有寡神通，所以信眾愈來愈濟，
可惜的是，信徒當中問佛法的、修持佛法的少，信仰的原素毋是皈依佛
法僧，是對伊個人的崇拜倚靠，致使恩師發病過身了後，信徒大多數也
消風無影跡。
    恩師住世時，朝天宮後壁開山廳佮醫務室的頂懸就是阮定定去的所在，
如今人不在，見擺去朝天宮就會唯後門舉頭看對樓仔頂，回想恩師慈祥
扭掠（敏捷）的形影！
     恩師別世前留一首偈：「流水杳然去，空山風露寒，一枝何云貴，總是素
 心難。」會當看出伊對人生有一份無奈佮壯志未成淒涼的感嘆吧！